Almatyda áıelin pyshaqtap óltirgen kúdikti 15 jylǵa sottaldy

ALMATY. KAZINFORM - Almaty qalasynyń qylmystyq ister jónindegi mamandandyrylǵan aýdanaralyq sotynda Ál-Beıne Zarıpovanyń kúıeýine sot sheshimi shyqty.

Sot málimetine sáıkes, osy jyldyń qańtar aıynda sottalýshy 3. birneshe saǵat buryn qyzyn kórý úshin demalystan oralǵan áıelimen kezdesip, aldaǵy ajyrasý týraly sóılesedi. Áıelimen aldaǵy ajyrasý týraly áńgimelesý kezinde qyzǵanysh pen ashýlyq tanytqan 3. jábirlenýshiniń moınyna, jambasyna jáne ishine as pyshaqpen kóptegen soqqy (barlyǵy on pyshaq jaraqaty) jasaǵan, alǵan jaraqatynan áıel sol jerde kóz jumdy.

Ári qaraı ol áıeliniń uıaly telefony arqyly jábirlenýshi jumys istegen seriktestiktiń shotynan óziniń jeke kásipkerlik esepshotyna 4 700 000 teńge aýdarǵan.

Prokýror sottalýshyny kináli dep tanyp, 15 jylǵa bas bostandyǵynan aıyrý jazasyn taǵaıyndaýdy surady.

- Sot úkimimen Z. kináli dep tanylyp, oǵan túpkilikti 15 jyl merzimge bas bostandyǵynan aıyrý jazasy taǵaıyndaldy. Sottalǵan azamattan «S» JShS-niń paıdasyna 4 700 000 teńge materıaldyq zalal, sonymen qatar bes jábirlenýshiniń paıdasyna jalpy somasy 20 000 000 teńge moraldyq shyǵyn óndirildi, - dep habarlady sot.

Úkim zańdy kúshine engen joq.

Eske salaıyq, buǵan deıin Zara kompanııasy qazaqstandyq kásipkerdi sotqa bergenin jazǵanbyz.