Almatyda áıeldiń ishinde dáke qalyp qoıǵan: isheginiń bir bóligin alyp tastaýǵa týra keldi
ALMATY. KAZINFORM — Almatyda kesar tiligi jasalǵannan keıin áıeldiń ish qýysynda dáke maılyǵy qalyp qoıǵan.
Dárigerler kesar tiligi kezinde umytyp ketken bul zat jas áıeldiń ishinen toǵyz aı ótken soń tabylǵan. Bul týraly zardap shekken áıeldiń múddesin qorǵaýshy zańger Anna Chernova málimdedi.
Onyń aıtýynsha, 2024 jyly tamyz aıynda azamatsha V. Almatydaǵy № 2 qalalyq emhanada (Qalalyq perınataldyq ortalyq) úshinshi balasyn kesar tiligi arqyly dúnıege ákelgen. Otadan keıingi kelesi kúni-aq áıel ishiniń qatty aýyratynyn aıtyp, ýltradybystyq zertteý (ÝDZ) jasaýdy suraǵan.
Alaıda zańgerdiń sózinshe, tekserý ústirt júrgizilip, birneshe kúnnen keıin jańa bosanǵan anany «bári durys» dep, úıine shyǵarǵan.
Úıine kelgennen keıin áıeldiń jaǵdaıy nasharlaı túsken. Іshi únemi aýyryp, salmaq tastap, tábeti qashyp, uıqysy buzylǵan. Saldarynan jańa týǵan sábıine qaraýǵa shamasy bolmaǵan.
— Ol jeke klınıkalarǵa qaraldy, ondaǵan tekserýlerden ótti, qomaqty qarajat jumsady, biraq bári nátıjesiz boldy. Dıagnozdar ártúrli boldy, biraq eshbir dáriger onyń naqty sebebin taba almady. Tek 2025 jyldyń mamyr aıynda jasalǵan KT (kompıýterlik tomografııa) jambas qýysynda belgisiz túzilisti kórsetti. Dárigerler isik dep kúdiktenip, áıeldi shuǵyl aýrýhanaǵa jatqyzdy. Tipti hırýrgter de ishinen ne tabylaryn boljaı almady, — dedi zańger Chernova.
Osy jyldyń 3 maýsym kúni shuǵyl jasalǵan operatsııa kezinde dárigerler áıeldiń ish qýysynan kesar tiligi kezinde umyt qaldyrylǵan dáke maılyqty tapqan.
— 9 aı boıy jatqan dáke irińdi qabynýǵa, perıtonıtke ákelip, ishki aǵzalardy zaqymdaǵan. Sonyń saldarynan ishektiń bir bóligin alyp tastaýǵa týra keldi, — dedi zańger.
Chernovanyń aıtýynsha, bul — bosaný mekemesinde jiberilgen óreskel nemquraılyq. Patsıent sotqa júginbek.
Almaty qalalyq qoǵamdyq densaýlyq saqtaý basqarmasy bul jaıtqa baılanysty túsinikteme berdi.
— Bul jaǵdaıǵa baılanysty Almaty qalasynyń Qoǵamdyq densaýlyq saqtaý basqarmasy Densaýlyq saqtaý mınıstrliginiń Medıtsınalyq qyzmetterdiń sapasy men qaýipsizdigin baqylaý komıtetine tekserý júrgizý týraly ótinish joldady. Tekserý nátıjesi boıynsha qoldanystaǵy zańnamaǵa sáıkes tıisti sharalar qabyldanatyn bolady, — delingen basqarma taratqan málimette.
Buǵan deıin Almatyda 46 jastaǵy áıel № 28 emhananyń kúndizgi statsıonarynda egilgen dáriden keıin komaǵa túskeni týraly jazǵanbyz.