Almatyda áıelderge arnalǵan qaýipsiz taksı tegin qatynaıdy
ALMATY. KAZINFORM — Jańa adamdar qozǵalysy Almaty kóshelerinde Qaýipsiz áıelder taksıi jobasynyń 7 kóligi júre bastaǵanyn málim etti.
Jańa adamdar qozǵalysy Memleket basshysy Qasym-Jomart Kemelulynyń tapsyrmasyn jáne Qaýipsiz Qazaqstan aktsııasyn júzege asyrý aıasynda qoǵamda qaýipsizdik pen qurmet mádenıetin qalyptastyrýǵa baǵyttalǵan jobany iske qosty. Bul joba myńdaǵan áıelder tap bolatyn máseleni kóteredi.
Joba belsendileriniń aıtýynsha, arnaıy bezendirilgen kólikterde sapar tegin. Júrgizýshiler de, jolaýshylar da tek áıelderden turady. Taksı 1 qyrkúıekke deıin Almatyda jáne qala mańyndaǵy aýdandarda — Qaskeleń men Besaǵashta jumys isteıdi.
Jolaýshylarǵa ózderi qalaǵan jaǵdaıda harassmentke nemese ózin qaýipsiz sezinbeýine baılanysty jeke oqıǵasymen bólisý usynylady.
— Jolaýshynyń kelisimimen ár kólikte qupııalylyq saqtala otyryp, aýdıo jáne beınetúsirilim júrgiziledi. Bul jazbalar jobaǵa tıesili YouTube arnasynda jarııalanady. Kórermender áıelderdiń shynaıy oqıǵalaryn tyńdap, zańgerler men psıhologtardyń keńesterin alyp, bastamany qoldaıtyn tanymal tulǵalardyń qatysýyn kóre alady, — delingen habarlamada.
Jobanyń basty maqsaty — árbir áıel ózin qaýipsiz ári estiletindeı sezinetin keńistik qalyptastyrý. Biz harassmentke nóldik tózimdilikti ornyqtyryp, jeke shekarany qurmetteıtin qoǵamdyq mádenıet qalyptastyrýdy kózdeımiz. Bul — árbir adam óz áreketi úshin jaýapkershilik alatyn Qaýipsiz jáne Ádiletti Qazaqstandy qurýdaǵy qadam.
Barlyq qalaýshylar bastamany qoldap, qoǵamdyq dıalogqa qatysý úshin Instagram dırektine jaza alady:
— @Tumaaarrr
— @Zhana.adamdar
Qyzyǵýshylyq tanytqan qyzdar taksı júrgizýshisi bolý úshin ótinim bere alady.
Eske sala keteıik, buǵan deıin Prezıdent «Jańa adamdar» jastar forýmynda sóz sóılegenin jazǵan edik. Forýmda «Jańa adamdar» qozǵalysynyń jetekshisi Ásel Badenova Prezıdentke uıym qurylǵaly beri qozǵalystyń atqarǵan ıgi isteri men azamattyq bastamalaryn tanystyrǵan bolatyn.