Almatyda áıelderdi qoldaýǵa arnalǵan mıtıng ótti - fotorep
ALMATY. KAZINFORM – 8 naýryz merekesi qarsańynda Almatyda áıelder quqyqtary men otbasylyq qundylyqtarǵa arnalǵan mıtıng ótti.
Mıtıng qaladaǵy Mahatma Gandı eskertkishi janyndaǵy saıabaqta ótti. Oǵan qatysýshylar áıel quqyǵy men qoǵamdaǵy ornyna qatysty áleýmettik máselelerdi kóterdi.
«Áıelderdiń laıyqty ómiri úshin. Za dostoınýıý jızn jenşın» atty is-sharany qıyn jaǵdaıda qalǵan áıelderdi qoldaý maqsatynda qurylǵan «Rahym» áleýmettik úıiniń negizin qalaýshy Bıbinur Sherálıeva uıymdastyrdy.
«Mıtıng maqsaty – jańa Úkimettiń bizdiń usynystarymyzǵa nazaryn aýdartý. Búgin áıelderge qatysty 30 máseleni kóterip jatyrmyz», – deıdi Bıbinur Sheralıeva.
Jıyn barysynda qatysýshylar bılikten jalǵyz baspanasynan áıelder men balalardy shyǵarýdy toqtatýdy, alıment tólemeıtinderge qatysty zańdy kúsheıtýdi, týǵan árbir balaǵa járdemaqy berýdi talap etti.
«Turǵyn úı máselesi áıelderdi jalǵyz baspanasynan shyǵarýǵa baılanysty týyndady. Ajyrasqannan keıin balaly áıelder kóshede, aqshasyz, nazarsyz qalady. Memlekettik deńgeıde balaly áıelderdi balalary kámeletke tolǵansha baspanasyz qaldyrmaý týraly túzetý engizý kerek. Ókinishke oraı, qazir bizde ajyrasý kóp. Bul da másele. Zań neke buzý kezinde múlikti bólý týraly tarmaqty da qaıta qaraýdy qajet etedi», – deıdi Bıbinur Sheralıeva.
Sondaı-aq qoǵam belsendisi aıtylǵan talaptar men kóterilgen máseleler 12 naýryzda Parlament otyrysynda usynylatynyn aıtty.
«Biz ádildik pen áıelder quqyǵy úshin kúresýdi jalǵastyramyz jáne óz talabymyzdy qoıamyz », - dedi ol.
Taǵy bir qoǵam belsendisi Baǵıla Baltabaeva ana men neke máselesin kóterdi. Onyń paıymdaýynsha, jastardy batystyq dep atalatyn qundylyqtardyń yqpalynan qorǵaý kerek.
Aıtýynsha, qyzdar turmysqa shyǵý, aıaýly ana ataný jáne demografııany kóterý sııaqty mıssııalaryn umytpaýy kerek.
Al er adamdar áıelin jaqsy kórip, qoldaý kórsetýi tıis.
«Búgin áıelder men balalardyń otbasy men ómirdegi problemalarǵa qatysty naqty máseleleri aıtyldy»,- deıdi ol.
Alına esimdi almatylyq elde turmystyq zorlyq-zombylyq týraly zańdy qataıtý kerek dep sanaıdy.
«Turmystyq zorlyq-zombylyq, zorlaý jıilep ketti. Sonymen qatar, zardap shekken áıelderdiń barlyǵy kýálik berýge daıyn emes, polıtsııaǵa da barmaıdy. Bul óz kezeginde qylmys jasaǵan adamdardy jaýaptan bosatý. Men zańdy qataıtyp, jábirlenýshiler men belsendilerdi qoldaıtyn qorlardy kóbeıtýdi jáne osy máseleni nazarda ustaýdy usynamyn», - dedi ol.
