Almatyda áıelder sút bezin qalaı tegin tekserte alady
ALMATY. KAZINFORM – 1-31 qazan aralyǵynda búkil álemde sút bezi obyry týraly habardarlyqty arttyrý aılyǵy – «Qyzǵylt qazan» ótedi.
Almaty onkologııalyq ortalyǵynyń konsýltatsııalyq-dıagnostıkalyq bóliminiń meńgerýshisi Aqbota Ádilovanyń aıtýynsha, sút bezi obyry qazir Qazaqstandaǵy áıelder arasynda eń kóp taraǵan onkologııalyq aýrý bolyp otyr. Degenmen, skrınıngtiń arqasynda keıingi jyldary ólim-jitim azaıǵan.
- Sońǵy 10 jylda sút bezi obyrynan bolatyn ólim-jitim skrınıng pen erte emdeýdiń arqasynda eki esege jýyq tómendedi. Bul óte mańyzdy, óıtkeni atalǵan aýrý áıelder arasyndaǵy onkologııalyq dıagnozdyń ishinde eń kóp taraǵany bolyp otyr. Aýrý neǵurlym erte anyqtalsa, ony tıimdi emdeý múmkindigi soǵurlym joǵary bolady, – dedi Aqbota Ádilova.
«Qyzǵylt qazan» aılyǵy áıelderge profılaktıkalyq tekserýiń mańyzyn eske salyp, em alyp jatqandardy qoldaýǵa baǵyttalǵan. Qazaqstanda aktsııa aıasynda onkologııalyq ortalyqtar ashyq esik kúnin ótkizedi. Áıelder onkomammologtardan tegin keńes alyp, ÝDZ ben mammografııadan óte alady.
- 1-31 qazan aralyǵynda ótetin «Qyzǵylt qazan» dárigerlerdi, naýqastar men áıel densaýlyǵyna beıjaı qaramaıtyn barlyq azamatty biriktiredi. Ashyq esik kúni mamanǵa júginip, tekserýden aqysyz óte alasyz. Almatyda mundaı is-sharanyń ótetin kúni men ýaqyty týraly aqparatty Almaty onkologııalyq ortalyǵynyń @almaty_onco paraqshasynan alýǵa bolady, – dedi maman.
Onyń sózinshe, búginde Almatyda sút bezi obyry dıagnozymen dıspanserlik esepte 9 520 patsıent tur. Bıyl 8 aıda alǵash ret 659 naýqas anyqtalǵan. Al jyl qorytyndysy boıynsha olardyń sany 990 bolýy múmkin.
Aqbota Ádilova Tegin mammografııalyq skrınıng 40-tan 76 jasqa deıingi áıelderge tirkelgen emhanasynda eki jylda bir ret qoljetimdi ekenin eske saldy.
Buǵan deıin Almatyda dárigerler kózine tas kirgen naýqastyń kórý qabiletin saqtap qaldy.
