Almatyda aıaldamany syndyrǵan 32 jastaǵy kúdikti ustaldy

ALMATY. KAZINFORM – 3 maýsym kúni jelide belgisiz er adamnyń Almatydaǵy aıaldamaǵa tas laqtyryp, áınegin syndyrǵan beınejazbasy taraǵan bolatyn.

Qalalyq polıtsııa departamenti Bostandyq aýdanynda buzaqylyq jasaǵan 32 jastaǵy er adamnyń ustalǵanyn habarlady.

– Ol aıaldamalardyń biriniń terezesin syndyrǵan. Quqyq buzýshynyń jeke basy birden anyqtaldy. Kúdikti ustalyp, polıtsııa departamentiniń ýaqytsha ustaý ızolıatoryna qamaldy. Qazirgi ýaqytta bul derek boıynsha sotqa deıingi tergeý amaldary júrgizilip jatyr, – dedi Bostandyq aýdandyq polıtsııa basqarmasynyń bastyǵy Dıdar Ahanov.

Sondaı-aq Almaty qalasynyń polıtsııasy azamattardy zań talaptaryn múltiksiz saqtaýǵa shaqyrdy.

Eske salaıyq, buǵan deıin Almatydaǵy avtobýs apatyna kúdikti dep tanylǵan jeńil kólik júrgizýshisi 2 aı úıqamaqta bolatynyn jazǵanbyz.