Almatyda aıaldamada turǵan adamdardy kólik qaǵyp ketti

ALMATY. KAZINFORM – Almatyda jeńil kólik aıaldamada turǵan adamdardy qaǵyp ketti.

Oqıǵanyń beınejazbasy áleýmettik jelide tarady. 

Almaty qalasy polıtsııa departamentiniń málimetinshe, jol-kólik oqıǵasy búgin, 3 qarasha kúni saǵat 14:00-de Áýezov aýdanynda bolǵan. BMW markaly kólik júrgizýshisi Abaı dańǵyly boıymen kele jatyp, Altynsarın kóshesiniń qıylysynda rólge ıe bola almaı qalǵan. 

– Ol jol jıektasyn basyp ótip, aıaldama kesheninde turǵan eki jaıaý júrginshini qaǵyp ketti. Olar dene jaraqattarymen jaqyn mańdaǵy aýrýhanaǵa jetkizildi, – dep habarlady departamentten.

Jol-kólik oqıǵasynyń mán-jaıyn Áýezov aýdanynyń polıtsııa basqarmasy anyqtap jatyr.

Eske salaıyq, buǵan deıin Kólsaı mańynda týrıster mingen kólik aýdarylyp, bir adam qaıtys boldy.