Almatyda avtojóndeý zaýyty memleketke qaıtaryldy

ALMATY. KAZINFORM – Almatyda tómen baǵamen satylǵan zaýyt memleket menshigine ótti. Almaty prokýratýrasy «832 avtoremontnyı zavod KI» AQ aktsııalarynyń 100 paıyzyn qaıtardy.

«Qala prokýratýrasy atalǵan aktsıonerlik qoǵamnyń jalǵyz aktsıoneri aktıvterdiń qunyn 310 mıllıon teńgege tómendetip, ony zańdy tulǵaǵa satqanyn anyqtady. Osy fakti boıynsha Almaty qalasy mamandandyrylǵan aýdanaralyq ekonomıkalyq sotynyń sheshimimen mámileni jaramsyz dep taný týraly prokýratýranyń talap aryzy qanaǵattandyryldy», - dep atap ótti vedomstvodan.

Osylaısha, 2,5 myń sharshy metr jáne 1,87 gektar jer ýchaskesi memleketke qaıtaryldy.

Buǵan deıin aýdany 3974 sharshy metr jáne 50 sotyq jeri bar bul keshendi Almaty qalasynyń burynǵy ákimi V. Hrapýnov jeke qurylymdarǵa zańsyz bergeni týraly jazǵan edik.