Almatyda avtoturaqtaǵy aqyly ýaqyt uzaryp, aqyly oryndar kóbeıedi
ALMATY. KAZINFORM – Almatyda bıyl aqyly avtoturaqtardyń sany aıtarlyqtaı artady.
Almaty qalasy Jol qozǵalysyn uıymdastyrý jáne jolaýshylar kóligi basqarmasynyń málimetinshe, bıyl qosymsha 8 myńnan astam kommýnaldyq aqyly avtoturaq ornyn uıymdastyrý josparlanǵan. Osylaısha kommýnaldyq avtoturaqtardyń jalpy sany 17 myńnan 25 myńǵa deıin kóbeıedi.
Jańa avtoturaqtardyń qatarynda trotýar boıyndaǵy jáne arnaıy alańdardaǵy avtoturaqtar bolady. Trotýar úlgisindegi kommýnaldyq aqyly avtoturaqtar 08:00-den 20:00-ge deıin jumys isteıdi. Buryn aqyly ýaqyt 9:00-den 19:00-ge deıin bolǵan edi. Al alańdyq avtoturaqtardyń, jerasty parkıngterdiń, qoǵamdyq kólikke aýysyp minýge arnalǵan turaqtardyń, kópdeńgeıli jáne mehanıkalandyrylǵan avtoturaqtardyń jumys rejımin basqarýshy uıym belgileıdi.
- Kommýnaldyq aqyly avtoturaqtardy paıdalaný aqysy bekitilgen tarıfke sáıkes avtokóliktiń avtoturaqta turǵan ár mınýty úshin esepteledi. Trotýar úlgisindegi kommýnaldyq aqyly avtoturaqtarda jolaýshylardy otyrǵyzý nemese túsirý, sondaı-aq kólikti tıeý nemese túsirý qajet bolǵan jaǵdaıda alǵashqy bes mınýtqa aqy alynbaıdy, - dep habarlady basqarmadan.
Jalpy qalanyń kommýnaldyq menshigindegi eń kóp avtoturaq orny Almaly aýdanynda ornalasqan - 5363. Odan keıin Medeý (5102) jáne Jetisý aýdandary (3494) tur. Al Alataý aýdanynda - 2637, Bostandyq aýdanynda - 787, Túrksib aýdanynda - 290, Naýryzbaı aýdany — 92, Áýezov aýdany — 60 aqyly avtoturaq orny bar.
Eske salaıyq, 2026 jyldyń 17 tamyzynan bastap almatylyqtar úı janynan 500 metr radıýsta tegin avtoturaq ornyn alýǵa ótinish bere alady.
