Almatyda avtoturaq tarıfi ózgeredi: júrgizýshiler neni bilýi kerek
ALMATY. KAZINFORM – Almatyda kommýnaldyq aqyly avtoturaqtarda 4 qazannan bastap jańa tarıfter qoldanysqa engiziledi.
Almatynyń Jol qozǵalysyn uıymdastyrý jáne jolaýshylar kóligi basqarmasynyń málimetinshe, qalalyq avtoturaqtarda saǵatyna 100 teńge tarıfi qoldanylyp keledi. Biraq kelesi aıdan bastap bul baǵa ózgeredi. Sebebi keıingi 10 jylda qaladaǵy kólik sany 1 mıllıonnan asyp, bul kóshe-jol jelisi men avtoturaqtarǵa túsetin júktemeni aıtarlyqtaı arttyrǵan.
- Ózgeristerdiń negizgi maqsaty – bos avtoturaq oryndarynyń qoljetimdiligin qamtamasyz etip, qala turǵyndary men qonaqtaryna turaq qoıýdy yńǵaıly etý. Qazir júrgizýshiler avtoturaq izdeýge kóp ýaqyt jumsaıdy. Bul óz kezeginde joldaǵy kólik qozǵalysyna qosymsha salmaq túsiredi, - dep habarlady vedomstvodan.
Jańa tártipke sáıkes, kólik qozǵalysy salystyrmaly túrde tómen ýchaskelerde tarıf burynǵydaı saǵatyna 100 teńge bolyp qalady. Avtoturaqtarǵa suranys ortasha aýmaqtarda saǵatyna 150 teńge belgilenedi. Al turaq oryndary tapshy ári kólik qozǵalysy joǵary, suranys eń kóp aımaqtarda tarıf saǵatyna 200 teńge bolady.
Bul rette irgeles úılerdiń turǵyndary turǵylyqty jeri boıynsha avtoturaqtardy tegin paıdalana alady. Ol úshin turǵyndar óziniń turǵyn úıine jaqyn ornalasqan avtoturaqty tańdap, bir kólikti tegin qoıýǵa arnaıy ruqsat rásimdeýi qajet.
Basqarma ókilderiniń aıtýynsha, saralanǵan tarıfti engizý avtoturaq oryndarynyń aınalymyn arttyryp, bos oryn izdeýge ketetin ýaqytty qysqartýǵa múmkindik bermek.
Eske salaıyq, buǵan deıin qalalyq máslıhat sessııasynda depýtattar avtoturaqtyń jańa tarıfin bekitti.
Odan buryn kommýnaldyq avtoturaqtardyń jalpy sany 17 myńnan 25 myńǵa deıin kóbeıetinin jazǵanbyz.
Úı janyndaǵy turaqqa kólikti tegin qoıý úshin qalaı ótinish berý kerek? Tolyǵyraq siltemede.
