Almatyda avtoturaq tarıfi kólik júktemesine qaraı belgilenbek
ALMATY. KAZINFORM — Almatyda qalalyq máslıhat sessııasynda kommýnaldyq aqyly avtoturaqtardyń tarıfterin kólik júktemesine qaraı saralaý usynyldy.
2016 jyldan beri kommýnaldyq aqyly avtoturaq tarıfi — saǵatyna 100 teńge.
10 jylda qaladaǵy kólik sany 1 mıllıonnan asyp, jol-kólik ınfraqurylymyna túsetin júkteme artty.
Almaty qalasy Jol qozǵalysy jáne jolaýshylar kóligin uıymdastyrý basqarmasynyń basshysy Erjan Dıhanbaevtyń aıtýynsha, biryńǵaı tarıfpen avtoturaq oryndarymen qamtamasyz etý qıyn. Sonyń saldarynan júrgizýshiler bos oryn izdeýge májbúr deıdi.
Osy máseleni sheshý úshin avtoturaq tarıfin aýmaqtaǵy kólik júktemesi men onyń fýnktsıonaldyq ereksheligine qaraı belgileý usynylady.
- Kólik júktemesi tómen ýchaskelerde saǵatyna 100 teńge tarıf saqtalady.
- Ortasha júktemeli aýmaqtarda tarıf — 150 teńge;
- Kólik kóp júretin ári avtoturaq oryndary tapshy ýchaskelerde — 200 teńge.
Aqyly avtoturaq aımaǵynda turatyn turǵyn úı ıeleri arnaıy ruqsat rásimdep, úıine jaqyn ornalasqan avtoturaqty tegin paıdalana alady. Sonymen qatar paıdalanýshylardyń keıbir sanattary úshin qoldanystaǵy jeńildikter de saqtalady.
— Jańa júıe avtoturaq oryndarynyń aınalymyn arttyryp, kólik kóp jınalatyn kóshelerde turaqtaý ýaqytyn qysqartýǵa jáne qysqa merzimge kólik qoıatyn júrgizýshiler úshin bos oryndardyń qoljetimdiligin jaqsartýǵa baǵyttalǵan, — delingen habarlamada.
Eske salaıyq, Almatyda avtoturaqtaǵy aqyly ýaqyt uzaryp, aqyly oryndar kóbeıetini habarlandy.
