Almatyda avtoturaq erejelerin buzǵan 15 myń júrgizýshi aıyppul arqalady
ALMATY. KAZINFORM — Almatyda jol qozǵalysy qaýipsizdigin arttyrý maqsatynda polıtsııa qyzmetkerleri profılaktıkalyq sharalar júrgizip jatyr.
Qalalyq polıtsııa departamentiniń málimetinshe, kólik quraldaryn toqtatý jáne turaqqa qoıý qaǵıdalaryn saqtaý máselesine, onyń ishinde turǵyn úı aýlalarynda tártiptiń saqtalýyna erekshe nazar aýdarylyp otyr.
— Jyl basynan beri avtoturaq erejelerin buzýdyń 15 myńnan astam deregi tirkeldi. Ásirese, kólikterdiń kógalǵa, jaıaý júrginshiler jolyna, bordıýrlarǵa qoıylýy, sondaı-aq abattandyrý talaptarynyń saqtalmaýy jıi anyqtalady. Sonymen qatar tótenshe qyzmetterdiń kólikteri úshin joldardyń jabylyp qalýy erekshe alańdaýshylyq týdyrady. Mundaı jaǵdaılar tótenshe sátterde aýyr saldarǵa ákelýi múmkin, — dep atap ótti departamentten.
Eske salaıyq, elordadaǵy «Kórkem-3» turǵyn úı kesheninde bolǵan órt shyǵyp, tótenshe jaǵdaı qyzmetkerleriniń oqıǵa ornyna jetýine avtoturaqqa durys qoıylmaǵan kólik kedergi jasady. Keıin erejeni buzǵan júrgizýshi jaýapkershilikke tartyldy.
