Almatyda avtoturaq baǵasy qymbattaı ma

ALMATY. KAZINFORM – Almatyda avtoturaq baǵasy ósýi múmkin be? Bul suraq boıynsha Kazinform tilshisi jaýapty mekemege saýal joldady.

Bıyl aqpan aıynda ekologııa máselesin jaqsartýdyń 2025-2027 jyldarǵa arnalǵan baǵdarlamasy ázirlenip, onyń negizinde jazda avtoturaq baǵasy ósetini habarlandy. 

Osyǵan oraı, Qalalyq mobıldilik basqarmasyna qarasty «Almaty parkıng» mekemesine saýal joldadyq. 

– Búgingi tańda qaladaǵy ártúrli aýmaqta avtoturaq qunyn ózgertý máselesin qosa alǵanda, avtoturaq keńistigin uıymdastyrý máselesi qarastyrylý kezeńinde tur. Bul sharalar ýákiletti organdarmen birlese otyryp keshendi tásildi talap etedi, qabyldanǵan sheshim týraly qosymsha habarlanady, - delingen mekeme jaýabynda.

Buǵan deıin avtoturaqtyń kóbeıýi qala ómirine qandaı ózgeris ákeletinin sarapshylardan suraǵan edik. 

Ýrbanıst Gúlmıra Baıǵabylovanyń pikirinshe, Almatydaǵy jerasty parkıngteri men aqyly avtoturaqtar barlyq avtokólikterdi syıdyra almaıdy. Qoldanystaǵy 12 500 aqyly avtoturaqtyń sanyn eki ese kóbeıtse de, bul jalpy kólikterdiń tek 3%-yn qamtıdy. 

– Adamdar úshin basty kólik quraly – avtomobıldiń bolýy tıimdi nátıje ákelip jatqan joq. Qosymsha avtoturaqtardyń salynýy qaıta kólikterdiń kóbeıýine áser etedi. Sebebi, turaq tabý qanshalyqty jeńil bolsa, adam negizgi qozǵalys quraly retinde kólikti sonshalyqty tańdaıdy. Nátıjesinde biz sheshimi joq sheńberde qalamyz: jol ınfraqurylymy ulǵaıady, sonymen birge avtomobıl, keptelis pen aýanyń lastanýy da kúrdelenedi, - dedi ol.

Sondaı-aq aqyly avtoturaqta turǵan kólik zaqymdalsa, oǵan kim jaýapty ekenin jazǵanbyz.