Almatyda avtomatty sýarý júıesi keńeıtilip keledi
ASTANA. KAZINFORM — Medeý aýdanynda 14 shaqyrymnan astam avtomatty sýarý jelisi tartyldy, dep habarlaıdy Almaty qalasy ákimdiginiń baspasóz qyzmeti.
Jambyl jáne Tóle bı kóshelerinde zamanaýı avtomatty sýarý júıesin ornatý jáne aýmaqty kógaldandyrý jumystary aıaqtaldy.
Munda sorǵy stantsııalary ornatylyp, shamamen 14 shaqyrym avtomatty sýarý jelisi júrgizildi. Jańa júıe jasyl jelekti ýaqytyly sýarýǵa jáne sýdy tıimdi paıdalanýǵa múmkindik beredi.
— Joba «Halyq qatysatyn bıýdjet» baǵdarlamasy aıasynda júzege asyryldy. Bıyl Medeý aýdanynda 30 joba iske asyrylyp jatyr. Onyń 10-y kógaldandyrý men avtomatty sýarý júıelerin ornatýǵa baǵyttalǵan. Barlyq jobany aýdan turǵyndary ózderi usynǵan, — delingen habarlamada.
Bul bastama aǵash, buta men kógaldardyń jaı-kúıin jaqsartyp, qoǵamdyq keńistikterdi kútip-ustaý sapasyn arttyrýǵa yqpal etedi.
Buǵan deıin Almatydaǵy aptap ystyq rekord jańartqanyn jazǵanbyz.
