Almatyda avtokólikterdi evakýatsııalaý úshin biryńǵaı tólem tártibi usynyldy
ALMATY. KAZINFORM — Almatyda qalalyq máslıhat sessııasynda kólik quraldaryn kommýnaldyq arnaıy turaqtarǵa evakýatsııalaý jáne ýaqytsha saqtaý aqysyn tóleýdiń biryńǵaı tártibin belgileý usynyldy.
Almaty qalasy Jol qozǵalysy jáne jolaýshylar kóligin uıymdastyrý basqarmasynyń basshysy Erjan Dıhanbaevtyń aıtýynsha, usynylyp otyrǵan ózgeris ustalyp, arnaıy turaqqa jetkizilgen kólikterge qoldanylady.
— Bul barlyq avtokólikti evakýatsııalaý jaǵdaılaryna qatysty emes. Usynylyp otyrǵan tártip kólik quraly ákimshilik quqyqbuzýshylyq týraly zańnamaǵa sáıkes ustalyp, arnaıy turaqqa jetkizilgen kezde ǵana qoldanylady, — dedi Erjan Dıhanbaev.
Jobaǵa sáıkes, kólik quralynyń barlyq sanatyna evakýatsııalaý quny 3 AEK ne 12 975 teńge bolady.
Al avtokólikti ýaqytsha saqtaý úshin bólek tarıf qarastyrylǵan.
Eger kólik ıesi evakýatsııalanǵan kúni 18:00–ge deıin avtokóligin alyp ketse, saqtaý aqysy alynbaıdy. Bul jaǵdaıda tek evakýatsııalaý quny tólenedi.
Eger kólik saǵat 18:00–den keıin arnaıy turaqta qalsa, saqtaý aqysy kólik sanatyna qaraı esepteledi. Alǵashqy táýlikke tómendetilgen mólsherleme belgilenedi.
Máselen jeńil avtokólikti saqtaý quny alǵashqy táýlikke 2,5 AEK, keıingi ár táýlikke 5 AEK bolady. Kóliktiń basqa sanattary úshin tólem mólsheri onyń túri men sıpattamalaryna qaraı saralanady.
Ne úshin jańa tarıf engizilmek
Bul tártipti engizýge 2025 jyly «Jol júrisi týraly» zańǵa engizilgen ózgerister negiz boldy. Oǵan sáıkes Astana men Almaty máslıhattaryna kommýnaldyq menshiktegi arnaıy alańdar men turaqtarǵa ustalǵan kólikterdi jetkizý jáne ýaqytsha saqtaý aqysyn belgileý ókilettigi berildi.
Tarıfterdi esepteý kezinde evakýatorlardy paıdalaný jáne kútip ustaý, arnaıy turaqtardyń táýlik boıy jumys isteýi, kúzet, kommýnaldyq qyzmetter men ınfraqurylymdy qamtamasyz etý shyǵyndary eskerilgen.
Qoldanystaǵy talaptarǵa sáıkes, evakýatorlar men qyzmetkerler táýlik boıy jumysqa daıyn bolyp, arnaıy turaqtar beınebaqylaý, jaryqtandyrý, qorshaý, baqylaý-ótkizý pýnkti jáne táýlik boıǵy kúzetpen qamtamasyz etilýge tıis.
Joba zańnamada belgilengen rásimderden ótip, qajetti oń qorytyndy alǵan.
Qujat qabyldanǵan jaǵdaıda ustalǵan kólikterdi evakýatsııalaý jáne saqtaý qunyn esepteýdiń biryńǵaı tártibi engiziledi.
Eske salaıyq, kólik qandaı jaǵdaıda aıyp turaǵyna jetkiziletinin habarladyq.
