Almatyda avtokólikter avtobýs jolaqtarymen qaı ýaqytta júre alady
ALMATY. KAZINFORM — Almaty kóshelerinde qoǵamdyq kólikke arnalǵan arnaıy jolaqtar kóbeıip keledi.
Elimizdiń ońtústik megapolısinde jyl saıyn adam sany da, kólik sany da artyp jatyr. Onyń áserinen qala kóshelerindegi keptelis demalys kúnderi de seıilmeıdi. Al tańerteń jáne keshke bolatyn uzyn-sonar keptelis almatylyqtar úshin úırenshikti úrdiske aınalǵan. Bir orynda saǵattap otalyp turǵan kólikterdiń tútini ekologııaǵa keri áserin tıgizip keledi.
Almaty ákimdigi jol-ınfraqurylymyna túsetin júktemeni azaıtyp, ekologııalyq ahýaldy jaqsartý úshin qalada qoǵamdyq kólikke basymdyq bere bastady. Mysaly, Jeltoqsan kóshesi men Raıymbek batyr dańǵylynda jańa BRT jelisi salynyp jatyr. Ol Tımırıazev kóshesindegi BRT-men jalǵanady.
Odan bólek Almatynyń jol qozǵalysy jáne jolaýshylar kóligin uıymdastyrý basqarmasynyń málimetinshe, megapolıs kóshelerinde jalpy uzyndyǵy 177 shaqyrym bolatyn qoǵamdyq kólikke arnalǵan arnaıy jolaqtar qarastyrylǵan. Barlyǵy — 26 kóshe men dańǵylda bar.
Jol qozǵalysy erejeleri boıynsha qoǵamdyq kólikke bólingen jolaqpen avtobýstar men troleıbýstar, polıtsııa ne jedel járdem syndy arnaıy kólik quraldary, sondaı-aq ózge kólikter burylys kezinde júre alady. Alaıda keı ýchaskede belgilengen ýaqytta kez kelgen avtokólik júre alady.
Atap aıtqanda, Raıymbek dańǵylynyń boıynda Saın kóshesinen «Aqkent» turǵyn úı keshenine deıingi aralyqtaǵy arnaıy jolaqta demalys pen mereke kúnderi, sondaı-aq jumys kúnderi saǵat 20:00–den 06:30–ǵa deıin ózge kólik quraldarynyń júrýine ruqsat etiledi.
— Bul shara kólik qozǵalysyn ońtaılandyrý jáne jol qozǵalysy júktemesi tómen kezeńderde qalalyq jol ınfraqurylymyn tıimdi paıdalaný maqsatynda engizilgen, — dep túsindirdi vedomstvo.
Almaty qalasy polıtsııa departamentiniń málimetinshe, bıyl 1 qańtar men 31 qazan aralyǵynda Almaty qalasy boıynsha joldyń júris bóligindegi jol belgileri men syzyqtarynyń talaptaryn saqtamaýǵa qatysty 542 227 ákimshilik quqyq buzýshylyq tirkelgen.
— Almaty qalasy boıynsha qoǵamdyq kólik qozǵalysyna arnalǵan arnaıy jolaqqa shyǵý derekterin barlyǵy 97 «Sergek» avtomattandyrylǵan baqylaý kamerasy tirkeıdi, — dep habarlady departamentten.
Eske salaıyq, Almatyda Pýshkın kóshesiniń bir bóligi alleıaǵa aınalyp jatqanyn jazǵanbyz.