Almatyda avtokólikten qarý men pyshaq tabyldy
ALMATY. KAZINFORM – Almatyda er adam kóliginde qarý alyp júrgen.
Qalalyq polıtsııa departamentiniń málimetinshe, Almatydaǵy ekologııalyq beketterdiń birinde 45 jastaǵy azamat basqaryp kele jatqan Mercedes avtokóligi toqtatylǵan.
Avtokólikti tekserý kezinde júksalǵyshtan qarýǵa jáne arnaıy quraldarǵa uqsas zattar tabylǵan. Ony tártip saqshylary tárkiledi.
- Atalǵan derek boıynsha qylmystyq is qozǵaldy. Tárkilengen zattardyń shyǵý tegi men naqty maqsat-mindetin anyqtaý úshin sot-ballıstıkalyq saraptama taǵaıyndaldy. Qazirgi ýaqytta is boıynsha qajetti tergeý áreketteri júrgizilip jatyr, - dep habarlady polıtsııadan.
Eske salaıyq, buǵan deıin Almatyda júrgizýshini tapanshamen qorqytqan azamat ustaldy.
Odan buryn polıtsııa qyzmetkerleri túngi ýaqytta estilgen atys daýsy boıynsha shaqyrtýǵa baryp, taǵy bir kólikten tapansha anyqtaǵan.
