Almatyda avtobýs júrgizýshisin urǵan jolaýshynyń soty taǵy keıinge qaldy
ALMATY. KAZINFORM – Almaty qalasy Alataý aýdandyq sotynda 32 jastaǵy Darhan Ahmetjanovqa qatysty sot otyrysy ótti.
Sot otyrysy barysynda oqıǵa kýágerleri shaqyrylyp, sózderi tyńdaldy. Kámeletke tolmaǵan jigittiń aıtýynsha, avtobýs apaty kezinde aıaǵyn syndyryp alǵan.
«Men 47-shi avtobýsqa otyrdym. Qulaqqappen án tyńdap kele jattym. Bir ýaqytta bir jolaýshynyń júrgizýshige qaraı júgirip bara jatqanyn baıqadym. Osydan soń avtobýs adamdardy qaqty. Men qulap qaldym, aıaǵymdy syndyrdym. Avtobýstyń ishinde shý shyqty. «Ne istep tursyńdar, kómektesińder», — dep bireý aıqaılady. Mine úsh aı ýaqyt ótti. Men kóp nárseni umyttym. Bir jolaýshynyń: «Júrgizýshige kómekteseıik», — degeni esimde. Ol esin endi jınaı bastaǵan edi. Men júre almadym, biraq, sonda bar kúshimdi jınap, tórt adam bolyp áıeldi kóterip, jedel járdem kóligine apardyq. Qazir júrsem, aıaǵym áli aýyrady», — dedi jasóspirim.
Sot otyrysyna sondaı-aq kýáger retinde «DýmanTrans» kompanııasy dırektorynyń orynbasary Manas Tazabekov shaqyryldy.
«Júrgizýshi Ermek Shókebaevaǵa qatysty jumysta eshqandaı aryz-shaǵym bolǵan joq. Jumysqa kirer kezinde tıisti qujattaryn tapsyrǵan. Qatelespesem, 7-8 jyl kólik júrgizý tájirıbesi bar… Negizi eshqandaı jolaýshy júrgizýshini joldyń boıynda toqtatýǵa haqy joq. Nege deseńiz ol jerde adamnyń ómiri bar, odan bólek jol ústinde apatty jaǵdaı týǵyzady. Júrgizýshi aıaldamada toqtaǵan kezde jolaqyny alyp, bıletti berýi kerek. Biraq, qozǵalys kezinde jol ústinde eshteńege alańdamaýy kerek. Jolaýshy jol ústinde avtobýsty toqtatýdy talap etken. Alaıda, ol jerde toqtaýǵa eshqandaı múmkindik bolmady. Birinshiden, toqtaıtyn jer joq, sebebi, ol kezde kópirdiń astynda ketip bara jatqan. Ekinshiden, onda úlken qozǵalys boldy. Júrgizýshi jol erejesin buzǵan bolar edi… Biz qaıtys bolǵan adamdardyń otbasylaryna kómegimizdi kórsetkenbiz», — dedi avtoparktyń ókili Manas Tazabekov.
Júrgizýshi Ermek Shókebaevanyń anasy qaza tapqan adamdardyń týystaryna ne úshin advokat qajet bolǵanyn túsinbeı dal bolýda.
«Olarǵa ne úshin advokat kerek? Meniń meniń qyzymda eshqandaı advokat joq qoı. Men ózim qaıtys bolǵandardyń otbasylaryna baryp, keshirim suraǵanmyn. Olar: «Sizdiń qyzyńyzdyń eshqandaı kinási joq» dep shyǵaryp salǵan. Al qazir mynadaı istep otyr. Bárin sot sheshedi», — dedi Ermek Shókebaevanyń anasy.
Aıta keteıik, avtobýsta júrgizýshi áıeldi urǵan Darhan Ahmetjanovqa qatysty sot otyrysy taǵy da keıinge, osy joly 3 sáýirge shegerildi.
Eske salsaq, ótken jyly jeltoqsan aıynda Almatyda №47 baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan áıel esinen tanyp, kólikti basqara almaı, aıaldamada turǵan bir top adamdy qaqqan.
Apat saldarynan 7 adam zardap shegip, 3 adam qaıtys boldy.
Qaza tapqan úsh adamnyń ekeýi erli-zaıypty ustazdar bolǵan. Olardyń artynda 4 balasy qaldy.
Avtobýs jolaýshysy ustalyp, oǵan qatysty QR QK 293-baby (buzaqylyq) jáne QR QK 351-baby (eki jáne odan da kóp adamnyń ólimine ákep soqqan kóliktiń qaýipsiz jumysyn qamtamasyz etetin erejelerdi buzý) boıynsha qylmystyq is qozǵaldy. Sondaı-aq ol eki aıǵa qamaýǵa alynǵan bolatyn.
Buǵan deıin avtobýsta júrgizýshi áıeldi urǵan Darhan Ahmetjanovqa qatysty sot otyrysy 20 naýryzda bastalǵan edi. Oǵan qatysty QR QK 293-baby (buzaqylyq) jáne QR QK 351-baby (eki jáne odan da kóp adamnyń ólimine ákep soqqan kóliktiń qaýipsiz jumysyn qamtamasyz etetin erejelerdi buzý) boıynsha aıyp taǵyldy. Alaıda, Almaty qalasy Alataý aýdandyq soty sotttalýshynyń sotyn 26 naýryzǵa shegergen edi.