Almatyda avtobýs júrgizýshisi jol ústinde kóz jumdy

ALMATY. KAZINFORM – Almatyda qoǵamdyq kólik júrgizýshisi reıs kezinde kenetten qaıtys boldy.

Oqıǵa 2026 jylǵy 25 qańtarda saǵat 14:35 shamasynda bolǵan. №92 baǵyttaǵy avtobýstyń (bort nómiri 2633) júrgizýshisi – 1971 jyly týǵan Aleksandr Stepanovtyń densaýlyǵy kúrt nasharlaǵany týraly habar KAP-2 dıspetcherlik qyzmetine túsken.

Oqıǵa Abaı dańǵyly men Saıyn kóshesiniń qıylysynda, avtobýs baǵdarshamnyń tyıym salatyn qyzyl túsine toqtap turǵan sátte bolǵan. Júrgizýshiniń jaǵdaıy aıaq astynan qıyndaǵan. Jolaýshylardyń biri jedel áreket etip, júrgizýshi kabınasyna kirip, tejegishti basqan. Sonyń arqasynda bolýy múmkin jol-kólik oqıǵasynyń aldyn alǵan.

Jolaýshylar birden jedel járdem shaqyrǵan. Alaıda oqıǵa ornyna jetken medıtsına qyzmetkerleri júrgizýshiniń qaıtys bolǵanyn anyqtady. Aldyn ala dıagnoz – jedel mıokard ınfarkti.

«Almatyelektrotrans» baspasóz qyzmetiniń málimetinshe, júrgizýshi sol kúni tańǵy 06:10-da mindetti reıs aldyndaǵy medıtsınalyq tekserýden ótken. Al avtobýs 06:24-te tehnıkalyq baıqaýdan ótkizilgen. 25 qańtar onyń 2/2 jumys kestesine sáıkes marshrýtqa shyqqan alǵashqy jumys kúni bolǵan. 

– Oqıǵa ornyna Áýezov aýdany jol polıtsııasy basqarmasynyń qyzmetkerleri jetti. Avtobýsqa tehnıkalyq zaqym kelmegen, jolaýshylar arasynda zardap shekkender joq. Tergeý sharalarynan keıin kólik parkke jetkizildi, - delingen habarlamada.

Aleksandr Stepanov «Almatyelektrotrans» JShS-de 2023 jyldyń tamyz aıynan beri jumys istegen. Jumysqa qabyldanǵan kezde jáne eńbek ótili barysynda dıspanserlik esepte turmaǵan. Otbasylyq jaǵdaıy – ajyrasqan.

Kompanııa marqumnyń týǵan-týystary men jaqyndaryna kóńil aıtyp, quqyq qorǵaý organdaryna tolyq qoldaý kórsetip jatqanyn jáne zańnama aıasynda otbasyna kómek berýge daıyn ekenin málimdedi.

Eske salaıyq, buǵan deıin Gýanchjoý – Almaty áýe reısinde jolaýshy qaıtys bolǵanyn habarlaǵanbyz.