Almatyda avtobýs júrgizýshileriniń jumysyn baqylaý úshin arnaıy qyzmet quryldy
ALMATY. KAZINFORM — Almatyda qoǵamdyq kólik jumysyna qatysty apta saıyn shamamen 800 shaǵym túsedi. Qala turǵyndary kóbine avtobýsty uzaq kútetinine, salonnyń tazalyǵyna, kondıtsıonerdiń jumys istemeıtinine, júrgizýshilerdiń áreketine narazy.
Osyǵan baılanysty qala bıligi tasymaldaýshylarǵa baqylaýdy kúsheıtip, kún saıyn jelidegi avtobýstar men júrgizýshilerdi tekseretin baqylaý-lınııalyq qyzmet qurdy.
Almatynyń jolaýshylar kóligi men jol qozǵalysyn uıymdastyrý basqarmasynyń basshysy Erjan Dıhanbaevtyń aıtýynsha, qoǵamdyq kóliktegi jolaqynyń baǵasyn kóterýdi qarastyryp jatqan joq eken. Onyń ornyna bılik tasymal sapasyn arttyryp, tasymaldaýshylar arasyndaǵy tártipti kúsheıtýge nazar aýdarmaq.
— Qoǵamdyq kólik árdaıym qoǵam nazarynda bolǵandyqtan, syn-pikir de kóp aıtylady. Biz turǵyndardyń ótinishin kún saıyn Open Almaty, e-Otinish, áleýmettik jeli men basqa da resmı arnalar arqyly baqylap otyramyz. Kóbine avtobýsty uzaq kútýge baılanysty, tazalyq pen jazda kondıtsıonerge qatysty shaǵym túsedi. Anyqtalǵan ár zańbuzýshylyq boıynsha tasymaldaýshyǵa qatysty shara qabyldanady, — dedi Erjan Dıhanbaev Almaty óńirlik kommýnıkatsııalar qyzmetinde ótken baspasóz konferentsııasynda.
Basqarma málimetinshe, aptasyna shamamen 300 ótinish Open Almaty arqyly, taǵy 400-i e-Otinish júıesi arqyly túsedi eken. Eń kóp shaǵym qalada úlken is-shara ótkende, aýa raıy nasharlaǵan kezde, kólik qozǵalysyna áser etetin jol-kólik apaty bolǵan sátterde tirkeledi.
Baqylaýdy kúsheıtý maqsatynda Almatyda baqylaý-lınııalyq qyzmet quryldy. Onyń qyzmetkerleri avtobýstardyń sanıtarlyq jáne tehnıkalyq jaǵdaıyn, qozǵalys kestesiniń saqtalýyn tekseredi, sondaı-aq júrgizýshilerdiń temeki shegip, rólde telefon ustap, jolaýshylarǵa dórekilik kórsetip, aıaldamadan ótip ketýi sııaqty zańbuzýshylyqtardy tirkeıdi.
«Almaty qalasynyń JQBBO» JShS baqylaý-lınııalyq monıtorıng qyzmetiniń basshysy Azat Tileýbaev tekserýler kún saıyn jelide de, avtobýs parkterinde de júrgiziletinin aıtty.
— Biz qala basshylyǵynyń tapsyrmasy boıynsha qoǵamdyq kólik jumysyn baqylap otyramyz. Jolaqy tóleý ǵana emes, jolaýshylarǵa qyzmet kórsetý sapasy, avtobýstyń sanıtarlyq jaǵdaıy, aıaldamaǵa toqtaýy men júrgizý mádenıeti de baqylanady. Ár júrgizýshi jelige shyǵar aldynda medıtsınalyq tekserýden ótedi. Eger júrgizýshiniń qan qysymy joǵary bolsa nemese basqa jaǵdaı bolyp jatsa, ony jumysqa jibermeıdi, — dedi Azat Tileýbaev.
Qyzmet málimetinshe, pılottyq joba bastalǵaly beri 989 zańbuzýshylyq anyqtalǵan. Olardyń qatarynda rólde uıaly telefon paıdalaný, aıaldamalarǵa toqtamaý, bılet bermeı, qolma-qol aqsha qabyldaý men jolaýshylarǵa qyzmet kórsetý erejesin buzý bar. Basqarmada zańbuzýshylyq jaǵy birtindep azaıyp kele jatqanyn da atap ótti.
Júrgizýshiler quramyn baqylaý týraly «Almatyelektrotrans» JShS paıdalaný jónindegi bas dırektordyń orynbasary Ashat Ábishev te aıtty. Onyń sózinshe, júrgizýshilerdi kún saıyn beınemonıtorıng pen uıqysy kelgenderdi baqylaıtyn arnaýly júıeler arqyly tekserip otyrady.
— Bizde júrgizýshilerdiń áreketin kún saıyn baqylaıdy. Telefon paıdalaný, jolaýshylarǵa dórekilik kórsetý men basqa da zańbuzýshylyqtar baqylanady. Apta saıyn shamamen 70 júrgizýshi tártiptik keńesten ótedi. Zańbuzýshylyqtyń sıpatyna qaraı eskertý jasaýdan bastap qatań sógis pen syıaqydan aıyrýǵa deıingi sharalar qoldanylady, — dedi Ashat Ábishev.
Erjan Dıhanbaev shaǵymnyń kóp ekenin moıyndaǵanymen, avtobýs júrgizý de qaladaǵy eń aýyr jumystyń biri ekenin aıtty.
— Jolaýshylar tarapynan da arandatý bolyp, keıbiri dórekilik jasap jatady. Soǵan qaramastan ádepten aspaı, jolaýshylarǵa sapaly qyzmet kórsetýge tyrysamyz, — dedi Erjan Dıhanbaev.
Eske salaıyq, buǵan deıin 2025 jyly jolaýshylardy zańsyz tasymaldaǵan 4 333 júrgizýshi jaýapqa tartylǵanyn habarlaǵan edik.
