Almatyda avtobýs júrgizýshileri jolaýshalardan oqshaýlanady

ALMATY. KAZINFORM – Almaty avtobýstarynda júrgizýshi otyratyn jer qorshalatyn bolady.

«Dabyl túımesine keler bolsaq, bizge usynys tústi. Qazir tehnıkalyq múmkindikter qarastyrylyp jatyr, eger bolashaqta muny jasaýǵa múmkindik bolsa, árıne, iske asyramyz. Bul másele áli de talqylanýda. Sondaı-aq qazir jańa avtobýstar satyp alynyp jatyr, júrgizýshi men jolaýshy arasyna qalqa ornatýdy josparlap otyrmyz», - dep jaýap berdi qalalyq mobıldilik basqarmasynyń basshysy Saǵyndyq Telibaev jýrnalıstermen kezdesý barysynda.

Basqarma basshysy bul máseleler 2023 jyldyń jeltoqsanynda bolǵan apattan keıin qarastyryla bastaǵanyn atap ótti.

Eske salaıyq, byltyr jeltoqsan aıynyń sońynda avtobýs bir top adamdy qaqqan edi.

Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan. 

Apat saldarynan 7 adam zardap shekti. Jedel medıtsınalyq qyzmet kelgenshe úsheýi qaıtys boldy.