Almatyda avtobýs pen kólik soǵyldy: zardap shekkenderdiń jaǵdaıy belgili boldy

ALMATY. KAZINFORM – Almatyda jolaýshylar avtobýsy men jeńil kólik soǵyldy. Zardap shekken 4 adamnyń bireýiniń jaǵdaıy aýyr.

Almaty densaýlyq saqtaý basqarmasynyń málimetinshe, №4 qalalyq klınıkalyq aýrýhanaǵa jedel medıtsınalyq járdem brıgadalarymen eki patsıent jetkizildi. Mýltıdıstsıplınarlyq brıgada qaraǵannan keıin olarǵa ýltradybystyq zertteý, kompıýterlik tomografııa jáne sholý rentgenografııasyn qosa alǵanda, qajetti klınıkalyq-dıagnostıkalyq tekserýler júrgizildi.
2005 jyly týǵan patsıent keshendi tekserýden soń turǵylyqty jeri boıynsha ambýlatorııalyq em alýǵa úıge jiberildi. 20 jastaǵy ekinshi jolaýshy anestezıologııa jáne reanımatsııa bólimine jatqyzyldy. Onyń jaǵdaıy aýyr dep baǵalanady, barlyq qajetti emdeý sharalaryn tolyq kólemde qabyldap jatyr.

– Balalar shuǵyl medıtsınalyq kómek kórsetý ortalyǵyna (BShMKKO) 17 jastaǵy jasóspirim de jetkizildi. Ony dárigerlik brıgada qarap, qajetti klınıkalyq-dıagnostıkalyq sharalar júrgizildi. Tekserý nátıjesi boıynsha oǵan oń ortan jiliktiń ortańǵy bóliginiń yǵysýymen jabyq synyǵy dıagnozy qoıyldy. Patsıent travmatologııa bólimine jatqyzyldy, ol Qazaqstan Respýblıkasy Densaýlyq saqtaý mınıstrliginiń dıagnostıka jáne emdeý hattamasyna sáıkes tolyq kólemde em qabyldap jatyr. Taǵy bir adam Almaty kópbeıindi klınıkalyq aýrýhanasyna (AKKA) jetkizildi, – dep habarlady Densaýlyq saqtaý basqarmasynan.

Osyǵan deıin Almatyda avtobýspen Audi kóliginiń soqtyǵysqany týraly jazǵan edik.

Saldarynan jeńil kólik júrgizýshisi men onyń úsh jolaýshysy túrli dene jaraqatyn alǵan bolatyn.