Almatyda avtobýs qaqqan adamdardyń háli qalaı - dáriger jaýaby

Almaty qalalyq densaýlyq saqtaý basqarmasy juma kúni avtobýs qaǵyp ketken naýqastardyń jaǵdaıy týraly aıtty, dep habarlaıdy Kazinform.

Basqarma taratqan málimetke sáıkes, 50 jastaǵy naýqas 24 jeltoqsan kúni jansaqtaý bóliminen kópjaraqat bólimshesine aýystyryldy.

«Jaǵdaıy aýyr dep baǵalanady, degenmen oń dınamıka baıqalady, shok jaǵdaıy jeńildetildi. Naýqastyń kóptegen synyǵy bar» dep habarlady vedomstvodan.

Al, avtobýs júrgizýshisi 36 jastaǵy áıel mı jaraqaty, bettiń jumsaq tinderiniń kógerýi dıagnozymen neırohırýrgııa bólimshesinde emdelip jatyr. Jaǵdaıy turaqty. Konservatıvti em alýda.

«55 jastaǵy er adamǵa mı jaraqaty, mıdyń jeńil shaıqalýy dıagnozy qoıyldy. Neırohırýrgııa bólimshesinde jatyr. Onda jelke aımaǵynyń jumsaq tinderiniń, bastyń jumsaq tinderiniń kógergen jarasy jáne moıynnyń baılam apparatynyń sozylýyna em júrgizilip jatyr. Jaǵdaıy turaqty. Barlyq naýqasqa qajetti medıtsınalyq kómek tolyq kólemde kórsetiledi» dep atap ótti densaýlyq saqtaý basqarmasynan.

Eske salaıyq, Almatyda avtobýs bir top adamdy qaqqan edi. Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan.

Apat saldarynan 7 adam zardap shekti. Jedel medıtsınalyq qyzmet kelgenshe úsheýi qaıtys boldy.

Sondaı-aq, Almatyda avtobýs júrgizýshisin urǵan jolaýshyǵa qatysty qylmystyq is qozǵalǵanyn habarlaǵanbyz.

Búgin kúdiktiniń eki aıǵa qamaýǵa alynǵany belgili boldy.