Almatyda avtobýs qaǵyp ketken áıel kóz jumdy
ALMATY. KAZINFORM — Almatyda qoǵamdyq kólik áıeldi qaǵyp ketti.
Almaty polıtsııa departamentiniń málimetinshe, jol-kólik oqıǵasy 12 tamyz saǵat 12:20 shamasynda Bostandyq aýdanynda bolǵan.
— Jeke tasymaldaýshyǵa tıesili avtobýstyń júrgizýshisi Mustafın kóshesimen ońtústik baǵytta kele jatyp, kósheni shyǵys baǵytta kesip ótken 1996 jyly týǵan áıeldi qaǵyp ketken, — dep habarlady polıtsııa departamentinen.
Alǵan jaraqattaryna baılanysty áıel oqıǵa ornynda qaıtys boldy. Adam ólimine ákep soqtyrǵan jol-kólik oqıǵasy boıynsha polıtsııanyń Anyqtaý basqarmasy qylmystyq is qozǵady. Oqıǵanyń mán-jaıy anyqtalyp, tergeý sharalary júrgizilip jatyr.
Eske salaıyq, Almatyda joldaǵy janjal kezinde júrgizýshini urǵan kúdikti ustaldy.
