Almatyda avtobýs egde jastaǵy áıeldi qaǵyp ketti

ALMATY. KAZINFORM – Jol-kólik oqıǵasy Almatynyń Medeý aýdanynda boldy.

Áleýmettik jelilerde oqıǵa ornynan túsirilgen vıdeo tarady.

Almaty polıtsııa departamentiniń málimetinshe, búgin, 17 qazanda saǵat 09:45 shamasynda avtobýs júrgizýshisi Maqataev kóshesimen shyǵys baǵytta kele jatyp, Zenkov kóshesimen qıylysynda jaıaý júrginshini – 1950 jyly týǵan áıeldi qaǵyp ketken. 

Jol apatynan áıel túrli dene jaraqatyn alyp, qaladaǵy aýrýhanalardyń birine jetkizildi.

– Apattyń barlyq mán-jaıyn Medeý aýdandyq polıtsııa basqarmasynyń qyzmetkerleri anyqtap jatyr, - dep habarlady qalalyq polıtsııa departamentiniń baspasóz qyzmeti.

Eske salaıyq, buǵan deıin Almatyda jedel járdem kóligi jasóspirimdi qaǵyp ketkenin jazǵanbyz.