Almatyda avtobýs birneshe jeńil kólikpen soqtyǵysty: zardap shekkender bar

ALMATY. KAZINFORM – Almatyda avtobýs jol apatyna ushyrady. Oqıǵanyń beınejazbasy áleýmettik jelide tarady.

Almaty qalasy Polıtsııa departamentiniń málimetinshe, jol-kólik oqıǵasy 8 maýsym kúni 11:50-de Túrksib aýdanynda bolǵan. Seıfýllın dańǵyly men Kassın kóshesiniń qıylysynda avtobýs júrgizýshisi tizginge ıe bola almaı, joldyń qarsy betine shyǵyp, 5 jeńil avtokólikpen soqtyǵysqan.

- Jol-kólik oqıǵasy saldarynan 6 adam dene jaraqatyn aldy. Olar aýrýhanaǵa jetkizildi. Jol-kólik oqıǵasy boıynsha Túrksib aýdandyq polıtsııa basqarmasy tergeý jumystaryn bastady, - dep habarlady departamentten.

Eske salaıyq, 2 maýsymda Astanada avtobýs júrgizýshisi rólge ıe bola almaı, jol jıegindegi baǵanǵa soǵyldy. Jedel medıtsınalyq járdem brıgadalary qala statsıonarlaryna barlyǵy 15 adamdy jetkizdi. Olardyń úsheýi aýrýhanaǵa jatqyzyldy. Jol apaty kezinde zardap shekken qyz balanyń aıaǵyna ampýtatsııa jasaldy.

Búgin Astana qalasynyń ákimi Jeńis Qasymbek jol apatynyń saldarynan eki aıaǵynan aıyrylǵan qyzdyń otbasyna ákimdik tarapynan baspana beriletinin aıtty.