Almatyda avtobýs apatqa ushyrap, bir áıel kóz jumdy
ALMATY. KAZINFORM – Almatyda qoǵamdyq kólik pen Mitsubishi soqtyǵysyp, bir adam qaza tapty.
Jergilikti polıtsııa qyzmetiniń kezekshi bóliminen málim etkendeı, jol-kólik apaty búgin túski saǵat 14:48-de Almatynyń Jetisý aýdanynda boldy.
«Mitsubishi» markaly kóliktiń júrgizýshisi Soltústik aınalma kóshesimen soltústik baǵytta kele jatyp, Bókeıhanov kóshesiniń qıylysynda jeke tasymaldaýshyǵa tıesili № 58-shi baǵyttaǵy qoǵamdyq kólikpen soqtyǵysqan.
«Jol apaty saldarynan «Mitsubishi» kóliginde otyrǵan áıel alǵan jaraqattarynan oqıǵa ornynda kóz jumdy. Adam ólimine ákep soqtyrǵan apat boıynsha qylmystyq is qozǵaldy. Saraptama taǵaıyndaldy»,- dep habarlady Almaty qalalyq polıtsııa departamentiniń baspasóz qyzmeti.
Eske salaıyq, 26 maýsym kúni Almatyda avtobýs apatqa ushyrap, bir adam qaza tapqan bolatyn.
Jol-kólik oqıǵasyna «5:32» serıalynyń prodıýseri sebepker bolǵan.
Keıin kúdikti dep tanylǵan jeńil kólik júrgizýshisi Anel Sartaeva tergeý ýaqytynda úı qamaǵynda bolatyny týraly jazǵan edik.
Aıta keteıik, Almatynyń qoǵamdyq kólikteri sońǵy 4 jylda 920 márte jol apatyna ushyraǵan.
