Almatyda avtobýs apatynan zardap shekken jolaýshylardyń altaýy aýrýhanaǵa jatqyzyldy

ALMATY. KAZINFORM – Almatyda Maqataev pen Masanshy kósheleriniń qıylysynda jeńil mashınaǵa, artynsha jol boıyndaǵy dúkenge soǵylǵan №18 baǵytyndaǵy avtobýs jolaýshysynyń altaýy aýrýhanaǵa jatqyzyldy. 

Densaýlyq saqtaý basqarmasy taratqan sońǵy málimetke sáıkes, jol apaty saldarynan zardap shegip, qala aýrýhanalaryna jetkizilgen naýqastar tolyq keshendi medıtsınalyq tekserýden ótti. Nátıjıesinde 6 eresek adam em-domyn aýrýhanada alatyn boldy. 

«Olardyń aıaq-qoly synǵan, jaǵdaıy ortasha aýyrlyqta dep baǵalanady. Barlyǵy qajetti emdi tolyq kólemde alyp jatyr. Qalǵan zardap shekkender qaralyp, tekserilgennen keıin turǵylyqty jeri boıynsha ambýlatorlyq emdeýge jiberildi. Onyń ishinde úsh jasósipirim de bar», - dep naqtylady vedomstvodan. 

Aıta keteıik, medıtsınalyq kómekke barlyǵy 25 adam júgingen. 

Eske salaıyq, Almatyda 18-shi baǵyttaǵy avtobýs apatqa ushyrap, bir adam qaza tapty. 

Keıin qoǵamdyq kólik kamerasy túsirgen beınejazba jelide tarady. 

Kýágerlerdiń aıtýynsha, qaza tapqan adam dúkenen shyǵyp kele jatqan. 

Polıtsııa departamenti jol apatyna sebepker bolǵan jeńil kólik júrgizýshi ustalyp, ýaqytsha ustaý ızolıatoryna qamalǵanyn málimdedi. Sondaı-aq rólde áıel adam bolǵanyn atap ótti.