Almatyda AUYL SPORT respýblıkalyq týrnıriniń fınaly ótti
ASTANA. KAZINFORM — Almatyda aýyl jastaryna arnalǵan AUYL SPORT jobasynyń aqtyq kezeńi joǵary deńgeıde uıymdastyryldy.
Fınalıster 10 myń baladan irikteldi
Joba Tımýr Qulybaevtyń Halyk qorynyń qoldaýymen iske asyp jatyr. Maqsat – aýyl jastary arasynda buqaralyq sportty nasıhattaý jáne damytý. Dodada elimizdiń 17 óńirinen kelgen 1 700 mektep oqýshysy baq synady.
Týrnırdiń fınalyna deıingi irikteý kezeńderine shamamen 10 myń bala qatysyp, 7 sport túri boıynsha sheberlikterin kórsetken. Atap aıtqanda, boks, kúres, karate, voleıbol, basketbol, shahmat jáne ústel tennısi boıynsha básekege tústi.
Aýyl men qala balasyna teń jaǵdaı jasaldy
AUYL SPORT týrnıriniń eń basty artyqshylyǵy - aýyldaǵy oqýshylar barlyq irikteýden ózi turatyn eldi mekende óte alady. Olardan qalaǵa kelý talap etilmeıdi.
Jattyǵý, tóreshilik jáne fınal birdeı erejelermen ótedi. Demek, qala men aýyl arasyndaǵy alshaqtyq qysqartylyp, barsha balaǵateń jaǵdaı usynylady.
Nátıje: óńirlerdiń áleýeti dáleldendi
Ótken maýsym qorytyndysy boıynsha, AUYL SPORT týrnıriniń 12 qatysýshysyQazaqstannyń jasóspirimder quramasyna qabyldanyp, Serbııada ótken ISF Gymnasiade halyqaralyq mektep oıyndarynda 4 medal jeńip aldy. Bul myqty sportshylar úlken qalalardan ǵana shyqpaıtynyn aıqyn kórsetti. Eger birdeı múmkindik berilse, ár shaǵyn qala, aýdan men aýyldan daryndar tabylatynyna dálel boldy.
Aýyl chempıony – el chempıony
Birqatar óńirde AUYL SPORT fınalısterin jerlesteriniń ulttyq týrnır qaharmandaryndaı qarsy alǵany qýantady. Sportshylardyń qurmetine mektepterde týlar jelbirep, quttyqtaýlar aıtylyp, kópshilik ystyq yqylaspen qoldaý bildirdi.
Týrnırge qatysyp, osyndaı qoshemetke bólengen ár bala úshin, bul – sport jolynda tókken teriniń, bastapqy talpynysynyń oblys, tipti el deńgeıinde moıyndalǵan alǵashqy sáti.
Kelesi qadam: turaqty irikteý júıesi
Uıymdastyrýshylar týrnırdi jyl saıyn ótkizip, geografııasyn keńeıtýdi jospar otyr. Sondaı-aq aýyl sportshylarynyń birtutas málimetter bazasynqurý da oılastyrylǵan. Bul federatsııalar men bapkerlerge jarysqa qatysýshylardyń nátıjesin baqylaýǵa, ulttyq quramalarǵa kadr rezervin jasaqtaýǵa múmkindik beredi.
Bul joba nesimen mańyzdy?
Qazaqstanda sport nysandary kóptep salynyp jatyr, ınfraqurylym kerek, biraq birqatar sebepke baılanysty olarǵa báriniń qoly jete bermeıtini túsinikti.
Osy oraıda, AUYL SPORT biregeı múmkindik usynady. Ol – aýyl mektebindegi sport zaldan ulttyq arenaǵa deıingi jolda qoldaý bildirip, jetistikterge jetýine yqpal etý. Bul – aýyl balasyn arman shyńyna qaraı talpyndyratyn týra jol. Rýhy myqty, namysy bıik jastyń bolashaǵy, ıaǵnı el sportynyń erteńi úshin qabyldanǵan mańyzdy sheshim.