Almatyda aýla sypyrýshylardyń jalaqysy ósedi

ALMATY. KAZINFORM — Bul týraly Almaty ákiminiń orynbasary Almashan Smatlaev aıtty.

Almatyda qalany sanıtarlyq tazalaýdyń jańa júıesi engizilmek. Endi ár aýdanǵa bir merdiger bekitiledi. Ol kóshelerdiń, trotýarlardyń, aryqtardyń, aıaldamalardyń jáne jasyl aımaqtardyń tazalyǵyna tolyq jaýap beredi.

Almashan Smatlaev kommýnaldyq qyzmetkerler sany eki esege artyp, 3175 adamǵa jetkenin atap ótti. Aıtýynsha, olardyń jalaqysy 170 myń teńgeden 350 myń teńgege deıin kóterildi. Táýlik boıy úsh aýysymdyq jumys kestesi engizildi jáne 300-den astam jańa tehnıka alynyp jatyr.

— Buryn bir kóshede birneshe kompanııa qatar jumys istep, túsinispeýshilik týyndaıtyn. Endi «qasbetten qasbetke deıin» qaǵıdatynyń engizilýi tártip pen úılesimdilikti joǵarylatady, — dedi Almashan Smatlaev.

Tekseristerdiń nátıjesi boıynsha ákimdik tek qajetti resýrstary bar bes merdigermen ǵana jumysyn jalǵastyrady. Qalǵandary aýystyrylady. Mundaı tásil qalanyń sanıtarlyq jaǵdaıyn edáýir jaqsartyp, turǵyndar úshin qolaıly orta qalyptastyrýǵa múmkindik bermek.

Eske salaıyq, buǵan deıin máslıhatta qala kóriktendirý erejelerine tolyqtyrýlar engizildi. Endi jaýyn-shashyn tym kóp túskende kóshelerdi kúsheıtilgen rejımde kútip-ustaý tetigi bekitildi.