Almatyda aýla sypyrýshylar men júrgizýshilerdiń jalaqysy ósti
ALMATY. KAZINFORM – Almatyda «Almaty Tazalyq» kommýnaldyq kásiporny qyzmetkerleriniń jalaqysy 30-55% aralyǵynda ósti. Bul týraly qala ákimdiginiń baspasóz qyzmeti Kazinform tilshisine egjeı-tegjeıli túsindirip berdi.
Ákimdiktiń málimetinshe, tazalyq qyzmetkerleriniń jalaqysy 2025 jylǵy 1 qazannan bastap ósken. Bıyl kásiporynnyń eńbekaqy qory edáýir ulǵaıyp, sol sebepti qyzmetkerlerdiń jalaqysyn kóterýge múmkindik týǵan.
Qazir mekemede 3 myńnan astam adam eńbek etedi. Olardyń barlyǵy tikeleı eńbek sharty boıynsha jumys isteıdi.
Jańa eńbekaqy mólsheri mynadaı:
• jol jumysshylarynyń ortasha aılyǵy 170 myń teńgeden 300-366 myń teńgege deıin,
• júrgizýshilerdiń jalaqysy 329 myńnan 420-584 myń teńgege deıin,
• al júrgizýshi-mehanızatorlardyń aılyq tabysy 361 myńnan 470-643 myń teńgege deıin artty.
Kórsetilgen somalarǵa áleýmettik jáne salyqtyq aýdarymdar kiredi, ıaǵnı bul – tolyq eseptelgen laýazymdyq eńbekaqy.
Ákimdik ókilderiniń aıtýynsha, qyzmetkerlerdiń tabysyn arttyrý qaladaǵy tazalyq sapasyna da oń áser etedi.
– Jalaqyny kóterý – eńbek jaǵdaıyn jaqsartý jáne qyzmetkerlerdiń yntasyn arttyrý sharalarynyń biri. Bul, ásirese, qysqy maýsymda qalany tazalaý jumystarynyń sapasyn kúsheıtýge baǵyttalǵan, - delingen ákimdik jaýabynda.
Sondaı-aq ákimdik jalaqyny kóterýmen qatar, qyzmetkerlerdiń turmys jaǵdaıyn jaqsartýǵa baǵyttalǵan sharalar da qolǵa alynǵanyn málimdedi. Qazir demeýshilik qarajat esebinen árqaısysy 12 adamǵa arnalǵan eki modýldik turǵyn blok satyp alynǵan. Jyl sońyna deıin syıymdylyǵy 60 oryn bolatyn taǵy 10 blok ornatý josparlanyp otyr.
Budan bólek, 28 oryndyq modýldik jataqhana ashý máselesi qarastyrylyp, Lomonosov kóshesi, 23 mekenjaıynda 100 oryndyq turaqty jataqhana qurylysy júrip jatyr.
Qysqy maýsymda qyzmetkerlerdiń jaıly turýyn qamtamasyz etý úshin qala turǵyn úı qorynan ýaqytsha eki úı bólinedi – árqaısysy 50 orynnan Naýryzbaı jáne Túrksib aýdandarynda.
Ákimdiktiń málimetinshe, kelesi jyly kommýnaldyq kásiporyn qyzmetkerleri úshin qosymsha 272 tósek-orynmen qamtamasyz etý kózdelgen.
Eske salaıyq, buǵan deıin Almatyda aýla sypyrýshylardyń jalaqysy ósetinin habarlaǵanbyz.