Almatyda aýktsıony eki ret ótpegen «Baısat» bazarynyń bolashaǵy qandaı bolmaq
ALMATY. KAZINFORM – Búginde «Baısat» bazary «Qaıtarylǵan aktıvterdi basqarý kompanııasy» JShS-nyń ıeliginde tur.
Bazardyń jańa ıesin anyqtaýǵa arnalǵan alǵashqy aýktsıon 2025 jyldyń 18 qarashasynda ótýi kerek edi. Bastapqy baǵasy – 28 639 882 000,00 teńge boldy.
Alaıda saýda-sattyq bastalǵan sátte satý nysany boıynsha tirkelgen qatysýshylar bolmaǵandyqtan, aýktsıon toqtatyldy.
Ekinshi saýda 2025 jyldyń 26 jeltoqsanynda belgilendi. Bul joly nysannyń bastapqy baǵasy 2 mlrd teńgege arzandap, 26 706 317 643 teńge boldy. Alaıda osy joly da aýktsıon satyp alýshy bolmaǵansyn ótpedi.
Osy oraıda, Kazinform agenttigi «Qaıtarylǵan aktıvterdi basqarý kompanııasy» JShS-yna saýal joldap, aýqymdy aktıvti ary qaraı qalaı paıdalaný josparlanyp otyrǵanyn surady. Eske salaıyq, keı jaǵdaıda saýdasy ótpegen nysandar memleket ıgili úshin paıdalanýǵa beriledi. Mysaly, Kárim Másimovtiń Astanadaǵy záýlim saraıy Oqý-aǵartý mınıstrligine berilgenin jazǵanbyz.
Alaıda «Qaıtarylǵan aktıvterdi basqarý kompanııasy» JShS «Baısat» bazaryn satýdan basqa jospar joq ekenin habarlady.
– «Baısat» bazary boıynsha aýktsıon ekinshi ret ótpeı qaldy, sebebi satyp alýshylardan birde-bir ótinim túsken joq. Mundaı jaǵdaı iri ári ereksheligi bar nysandarda jıi kezdesedi. Bizdiń ustanym ózgerissiz: aktıv ashyq, básekeli jaǵdaıda jáne memleket úshin barynsha tıimdi túrde satylýǵa tıis, - delingen kompanııa jaýabynda.
Eske salaıyq, 2024 jyldyń qańtarynda Qaırat Satybaldynyń ulyna tıesili «Baısat» bazarynyń bir bóligi memleketke qaıtarylǵanyn jazǵanbyz.