Almatyda aýyr júk kólikterine baqylaý kúsheıedi
ALMATY. KAZINFORM — Almatyda aýyr júk kólikteriniń shamadan tys júktemesine baılanysty baqylaý qatańdatylmaq. Qalalyq máslıhatta ótken komıssııa otyrysynda joldardyń merziminen buryn tozýyna áser etetin negizgi sebepterdiń biri ruqsat etilgen normadan artyq júk tasý ekeni aıtyldy.
Máslıhat depýtaty Sadır Hamraevtyń aıtýynsha, qaladaǵy keıbir júrgizýshiler zańdy elemeı, 8 tonnaǵa arnalǵan jolmen 18 tonnaǵa deıin júk tasymaldaıdy. Munyń kesirinen jol jabynynyń jyldam buzylady.
— Búgin biz jumys tobyn quryp, jol polıtsııasy, kólik baqylaý jáne jol qozǵalysyn uıymdastyrý basqarmasymen birlesken jumysty kúsheıtý týraly sheshim qabyldadyq. BAQ ókilderiniń qatysýymen reıdter uıymdastyrylyp, zań talaptaryn buzatyn júrgizýshiler men kompanııalar anyqtalady, – dedi depýtat.
Qazir Almatyda júk kólikteriniń salmaǵyn ólsheıtin tek bir jyljymaly stantsııa bar. Máslıhat músheleri mundaı beketterdiń sanyn arttyryp, joldarǵa arnaıy salmaq ólsheıtin datchıkter ornatý qajettigin kóterdi.
Almaty polıtsııasy bolsa, aýyr júk kólikteriniń qozǵalysyna shekteý qazir tek ál-Farabı, Dostyq jáne Nazarbaev dańǵyldarynda bar ekenin málimdep, mundaı aımaqtardy keńeıtý usynysyn qoldady.
Otyrys qorytyndysy boıynsha jol qozǵalysyn uıymdastyrý basqarmasy, kólik baqylaý jáne polıtsııa arasynda ózara is-qımyldy úılestiretin jumys toby qurylatyn boldy. Sonymen qatar depýtattar joldardyń júktemesin ólsheýge arnalǵan qosymsha quraldarmen jabdyqtaý jáne Almaty qalasynda júk kólikteriniń qozǵalysyn ońtaılandyrý tujyrymdamasyn ázirleý bastamasyn kóterdi.
Eske salaıyq, buǵan deıin Shymkentte 15 qazannan bastap artyq júk artqan júk kólikteri avtomatty túrde anyqtalatynyn habarlaǵan edik.