Almatyda aýyr mashına jasaý zaýytynyń jyljymaıtyn múlki zańsyz satylǵan

ALMATY. KAZINFORM — Almatydaǵy mashına zaýytynyń jyljymaıtyn múlki memleketke qaıtaryldy.

Almaty qalasy prokýratýrasynyń málimetinshe, buǵan deıin qadaǵalaý organy zaýyt múlkin zańsyz satý faktilerin anyqtaǵan.

Qala prokýratýrasynyń qadaǵalaý aktisin oryndaý sheńberinde memlekettik múlik jáne jekeshelendirý komıteti sotqa mámilelerdi jaramsyz dep taný týraly talap-aryzben júgindi.

— Talap-aryzdyń mazmuny zaýytqa 37 ga astam jer ýchaskesin jáne jalpy aýdany 79 966 sharshy metr bolatyn 94 turǵyn emes úı-jaıdy qaıtarýǵa baılanysty boldy. Sot talapkerdiń talaptaryn qanaǵattandyrdy, apellıatsııalyq saty sheshimdi kúshinde qaldyrdy, — dep habarlaıdy prokýratýradan.

Aıta keteıik, «Almaty aýyr mashına jasaý zaýyty» 1941 jyly negizi qalanǵan iri kásiporyn. Alǵashynda soǵysqa qajetti ónim shyǵarǵan óndiris 1946 jyldan bastap beıbit maqsattaǵy mıssııaǵa kóshken. Sol jyldardan bastap metallýrgııaǵa qajetti qural-jabdyq óndirisi jolǵa qoıylyp keledi.

2022 jyly «Nomad» turǵyn úı kesheninde turatyn almatylyqtar ákimnen aýyr mashına jasaý zaýytynyń jumysy turǵyndardyń densaýlyǵyna zııanyn tıgizip jatqandyqtan ony qala syrtyna kóshirýdi suraǵan bolatyn.