Almatyda aýyr qylmys jasady degen kúdikpen izdeýde júrgen er adam ustaldy
ALMATY. KAZINFORM — Almaty polıtsııa qyzmetkerleri bopsalaý jáne tonaý derekteri boıynsha aýyr qylmys jasady degen kúdikpen izdeýde júrgen er adamdy qolǵa túsirdi.
Polıtsııanyń habarlaýynsha, bul qylmys 2024 jyly jasalǵan. Tergeý málimetinshe, úsh adamnan quralǵan top qorqytý jáne kúsh qoldaný arqyly shamamen 3 mıllıon teńge kólemindegi aqshany zańsyz ıemdengen.
Osy fakti boıynsha sotqa deıingi tergep-tekserý bastalyp, qylmysqa qatysy bar eki adam dereý ustalyp, sot úkimimen jazalanǵan. Al úshinshi kúdikti oqıǵa ornynan boı tasalap, keıinnen izdeý jarııalanǵan.
Іzdeýde júrgen adamnyń júrgen jeri anyqtalyp, ol ustaldy.
— Kúdikti bir jyldan astam ýaqyt boıy jasyrynyp júrgen. Maqsatty ári júıeli júrgizilgen jedel-izdestirý jumystarynyń nátıjesinde onyń ornalasqan jeri anyqtaldy. Qazir ol ýaqytsha ustaý ızolıatoryna qamalyp, zańda belgilengen tártippen jaýapkershilikke tartylady, — dedi Áýezov aýdandyq polıtsııa basqarmasynyń bastyǵy Danııar Mendebaev.
Eske salaıyq, buǵan deıin Almaty oblysynda barymtamen aınalysqan qylmystyq top ustalǵanyn jazǵanbyz.