Almaty áýejaıynda shetel azamaty 3 keli esirtkimen ustaldy

ALMATY. KAZINFORM – Almaty halyqaralyq áýejaıyndaǵy jelilik polıtsııa bólimi iri kólemdegi esirtkini anyqtady.

Kóliktegi polıtsııa departamentiniń málimetinshe, «Phýket–Almaty» áýe reısimen kelgen 42 jastaǵy Úndistan azamatynan tyıym salynǵan zattar tabyldy. Onyń júgin tekserý kezinde polıtsııa qyzmetkerleri salmaǵy 2 kg 995 gramm bolatyn marıhýanany tárkilegen.

- Atalǵan derek boıynsha kólik polıtseıleri sotqa deıingi tergep-tekserý amaldaryn júrgizdi. Almaty qalasynyń mamandandyrylǵan aýdanaralyq qylmystyq ister jónindegi soty shetel azamatyn kináli dep tanyp, ony 15 jyl 2 aı merzimge bas bostandyǵynan aıyrý jazasyna kesti, - dep habarlady departamentten.

Jalpy 2025 jyldyń 11 aıynda Kóliktegi polıtsııa departamentiniń qyzmetkerleri esirtkige qatysty 347 za buzýshylyqty anyqtaǵan. Onyń ishinde: 52 satý faktisi, 19 asa iri kólemde saqtaý, 2 transulttyq qylmystyq top qurý, sondaı-aq 12 kontrabanda faktisi. Zańsyz aınalymnan jalpy 781 keliden astam esirtki zattary tárkilendi.

Eske salaıyq, buǵan deıin Almaty áýejaıyna patron ákelgen stýdentke 800 myń teńgege jýyq aıyppul salyndy.