Almatyda áýejaıǵa deıin ekinshi metro jelisin salý úshin 93 jer telimi alynady

ALMATY. KAZINFORM – Almatyda memleket muqtajy úshin 93 jer ýchaskesi alynady.  

Almaty qalasy ákimdiginiń 2025 jylǵy 10 qarashadaǵy № 4/675-1365 qaýlysyna sáıkes, metropolıten ekinshi jelisiniń obektilerin salý úshin Almaly, Medeý jáne Túrksib aýdandarynyń aýmaǵynda ornalasqan 93 jer ýchaskesi májbúrlep ıelikten shyǵarylady. Bul — «Jibek joly» metro beketinen Almaty halyqaralyq áýejaıyna deıingi ýchaskeler. Tıisti qaýly «Almaty aqshamy» gazetinde jarııalandy.

Májbúrlep ıelikten shyǵarý merzimi — 2028 jyldyń 31 jeltoqsanyna deıin belgilendi. Almaty qalasynyń jer qatynastary basqarmasy zańnamamen belgilengen tártipte jer ýchaskeleriniń menshik ıelerine ótemaqy tóleýdi qamtamasyz etedi. Jer telimderi satyp alynǵan soń, Almaty qalasy jol ınfraqurylymyn damytý
basqarmasynyń teńgerimine beriledi.

Eske salaıyq, aldaǵy jyldary Almatyda úsh baǵytta metronyń 23 beketi salynady. Qoldanystaǵy jeli Alataý kóshesi arqyly «Barlyq» stantsııasyna deıin uzartylady — munda 3 metro beketi bolady (5,3 km). «Jibek joly» beketinen Almaty áýejaıyna deıin 8 beket pen 14 shaqyrym metro jelisi salynady. Sondaı-aq úshinshi baǵytta — «Saıran» beketinen Alataý qalasyna deıin 12 beket (21,5 km) salý josparlanǵan.