Almatyda Áýejaı jáne Altynkól kóliniń túbi tazartylady
ALMATY. KAZINFORM — Almaty qalasynyń ákimi Darhan Satybaldy Túrksib aýdanynada ekologııalyq jaǵdaıdy jaqsartýǵa jáne qalalyq ınfraqurylymdy damytýǵa baǵyttalǵan jobalardyń júzege asyrý barysymen tanysty.
Shahar basshysy Altynkól kóline bardy. Munda jaqynda №18 jáne №19 toǵandardy mehanıkalyq tazalaý jumystary bastalady. Jumystar 26 myń sharshy metrden astam aýmaqty qamtıdy. Kóldiń aınalasy laıdan, qamys jáne qoqystan tazartylady. Bul sý qoımasynyń ekologııalyq jaǵdaıyn qalpyna keltirýge jáne onyń demalys áleýetin arttyrýǵa múmkindik beredi.
Budan soń qala basshysy Rysqulov dańǵylynan Áýejaı kóline deıingi aralyqtaǵy Kishi Almaty ózenin qaıta jańartý jobasymen tanysty. Jaǵalaý aýmaǵyn keshendi abattandyrý, kópirler salý, jaǵalaýlardy nyǵaıtý jáne ózen boıynda zamanaýı saıabaq aımaǵyn qurý josparlanǵan. Dızaın bıyl jyl sońyna deıin aıaqtalady.
Jobalaý kezinde jaıly qalalyq ortany tabıǵı tepe-teńdikpen úılestirýge baǵyttalǵan zamanaýı qala qurylysy tásilderi qoldanylyp jatyr. Aýmaqta bıologııalyq ártúrlilik joǵary, ıaǵnı kóptegen qus, jándik túrleri jáne ósimdikter kezdesedi. Joba aıasynda olardy saqtaý sharalary qarastyrylǵan.
Budan ózge, Áýejaı kólin mehanıkalyq tazartý jáne sý deńgeıi men sý almasýdy retke keltirý úshin shandor qurylǵylaryn qalpyna keltirý jumystary josparlanýy tıis degen tapsyrma berildi.
Sondaı-aq, qala ákimi Nurshashqan shaǵynaýdanyndaǵy aýmaqty aralady. Qala qurylysy qujattamasyna sáıkes, bul aýmaqty kógaldandyrylǵan demalys aımaǵyna aınaldyrý kózdelgen.
Jobany júzege asyrý 15 turǵyn úıge qatynaıtyn joldy qamtamasyz etip, jaqyn mańdaǵy turǵyn úılerdiń 7 myńnan astam turǵyny úshin jasyl aımaqtarǵa qoljetimdilikti arttyrady.
Darhan Satybaldy sý aıdyndaryn tazartý, jaǵalaý aýmaqtaryn abattandyrý, jańa qoǵamdyq keńistikter qurý jónindegi jergilikti bastamalar biryńǵaı ekologııalyq jáne qala qurylysy saıasatynyń bóligi retinde iske asyrylýy tıis ekenin atap ótti.
Aıtýynsha, qala turǵyndarynyń ıgiligine negizdelgen ornyqty, jaıly ári qaýipsiz qalalyq orta qalyptastyrýǵa basymdyq beriledi.
Buǵan deıin «Atakent» iskerlik yntymaqtastyq ortalyǵyn qaıta qurý jumystary bastalatyny týraly jazǵanbyz.