Almatyda áýejaı mańyndaǵy turǵyn úı qurylysy toqtatyldy

ALMATY. KAZINFORM — Almatyda halyqaralyq áýejaı mańyndaǵy birqatar turǵyn úı kesheniniń qurylysy tekserildi. 

Almaty ákimdiginiń málimetinshe, tekserý barysynda «Bastion» turǵyn úı kesheniniń qurylysy azamattyq avıatsııa salasyndaǵy ýákiletti organdardyń kelisiminsiz jáne ruqsatsyz júrgizilip jatqany anyqtaldy.

— Qoldanystaǵy zańnama talaptaryna sáıkes, áýe aılaǵyna jaqyn aımaqtarda jáne belgilengen kúzet aýmaǵy radıýsynda ǵımarattardyń qabatyna shekteýler qoıylady. Osy aımaqta salynyp jatqan barlyq nysan tıisti kelisim alýǵa mindetti. Mundaı qujatsyz biz qurylysty toqtatamyz, qajet bolǵan jaǵdaıda súriledi, — dedi Almaty ákiminiń orynbasary Beıbit Shahanov.

Sondaı-aq «Dream City Tech» turǵyn úı kesheniniń qasbetin qurylysshylar eshqandaı kelisimsiz qaptaı bastaǵany belgili boldy. Qala ákimdigi «Shyǵys qaqpasy» polıortalyǵyndaǵy barlyq qurylys nysanynyń sáýlettik kelbeti bekitilgen biryńǵaı tujyrymdamaǵa saı bolýǵa tıis ekenin atap ótti.

— Bul zańbuzýshylyqtarǵa baılanysty atalǵan nysandarda barlyq qurylys jumysyn mindetti kelisim men ruqsat alynǵanǵa deıin toqtatý týraly sheshim qabyldandy, — dep habarlady ákimdikten.

Eske salaıyq, buǵan deıin Almatyda nelikten № 1 qalalyq perzenthana ǵımaraty súriletinin jazǵanbyz.