Meıramhanadaǵy janjal: prokýrorǵa qatysty Almaty polıtsııasy tekserý júrgizip jatyr
ALMATY. KAZINFORM — Almatyda meıramhanada Almaty oblysy Eńbekshiqazaq aýdandyq prokýratýrasynyń qyzmetkeri tóbeles shyǵardy dep aıyptaldy.
Áleýmettik jelide Almatydaǵy oıyn-saýyq ornynda tynyshtyqty buzǵany úshin Eńbekshiqazaq aýdany aǵa prokýrorynyń qamaýǵa alynǵany týraly aqparat tarady.
Jelide taraǵan aqparatqa sáıkes, oqıǵa 5 qyrkúıekte bolǵan Eńbekshiqazaq aýdanynyń aǵa prokýrory Álisher Sadyqov mas kúıinde mekemede janjal shyǵaryp, polıtsııa qyzmetkerlerine baǵynbaǵan. Sodan keıin ol polıtsııa bólimshesine jetkizilgen. Sondaı-aq oǵan eshqandaı protsessýaldyq sharalar qoldanylmaǵany jáne prokýrordyń bosatylǵany jazylǵan.
Almaty polıtsııa departamenti jaǵdaıǵa túsinikteme berip, rasymen janjal bolǵanyn rastady.
— Oqıǵaǵa qatysy barlar Almaly aýdandyq polıtsııa bólimine jetkizildi. Tergeý júrgizilip jatyr. Tergeý nátıjesi boıynsha tıisti sheshim qabyldanady, — dep habarlady Almaty polıtsııa departamentiniń baspasóz qyzmeti.
Eske salaıyq, tóbeles shyǵardy degen aıyppen Qurt laqap atymen belgili reperdiń ústinen qylmystyq is qozǵalǵany habarlandy.
