Almatyda aýany tazartýǵa qandaı sharalar qoldanylady

ALMATY. KAZINFORM – Almaty ákimdigi ekologııalyq ahýaldy jaqsartýǵa baǵyttalǵan jańa sharalar týraly habarlady.

Qala ákimdiginiń málimetinshe, aýa lastanýyn azaıtýǵa baǵyttalǵan ıgi bastamalardyń biri – atmosferalyq aýany qorǵaýǵa arnalǵan jańa erejeler jobasyn ázirleý, ıaǵnı «Atmosferalyq aýany qorǵaý salasyndaǵy arnaıy ekologııalyq talaptardy engizý týraly» qujat.

– Qujat bıyl tamyz aıynda qoǵamdyq talqylaýdan ótti. Jobanyń basty maqsaty – megapolıstegi aýanyń lastaný deńgeıin júıeli túrde tómendetý. «Renessans plıýs» kompanııasynyń málimetinshe, zııandy shyǵaryndylardyń shamamen 60 paıyzy avtokólikten shyǵady. Qalǵan bóligi jeke turǵyn úıler ónerkásip oryndary, monsha men káýaphana, qoǵamdyq tamaqtaný nysany men qurylys alańdary syndy statsıonarlyq lastaný kózderiniń qyzmetimen baılanysty, - dep habarlady ákimdikten.

Qala basshylyǵy bul qujattaǵy erejeler qalanyń bolashaq ekologııalyq saıasatynyń berik irgetasy bolatynyn atap ótti.

– Onyń negizinde zııandy shyǵaryndyny azaıtýǵa, aýa sapasyn jaqsartýǵa baǵyttalǵan naqty qadamdar men tetikter kezeń-kezeńimen júzege aspaq. Usynylǵan sharalardyń arasynda óndiris oshaqtaryn jańǵyrtý, ekologııalyq taza otyn túrlerine kóshý sekildi mańyzdy baǵyttar bar, - delingen málimdeme.

Sonymen qatar «Taza aýa aımaǵy» jobasy aıasynda júrgizilgen saýalnama barysynda keıbir turǵyndar taza aýamen tynystaý úshin taýǵa shyǵýǵa májbúr ekenin jetkizgen. Olardyń pikirinshe, ekologııalyq ahýaldy jaqsartý birlesken kúsh-jigerdiń nátıjesinde ǵana júzege asatyn ortaq is.

Eske salaıyq, buǵan deıin «Ashyq NQA» saıtynda Almaty aýasyn tazartýdyń jańa erejeleri talqylaýǵa shyǵarylǵanyn jazǵan edik.