Almatyda aýany lastap jatqan nysandardy anyqtaıtyn 20 mobıldi stantsııa satyp alynady
ALMATY. KAZINFORM – Máslıhat otyrysynda atmosferalyq aýa sapasyn baqylaýǵa arnalǵan 20 mobıldi ekologııalyq stantsııa satyp alý máselesi qaraldy.
Qalalyq ekologııa jáne qorshaǵan orta basqarmasy ókilderiniń málimetinshe, búginde Almatyda 16 statsıonarlyq baqylaý beketi jumys isteıdi. Alaıda olar qalanyń barlyq aýdanyn tolyq qamtýǵa jáne lastaný kózderin jedel anyqtaýǵa múmkindik bermeıdi.
Osy máseleni sheshý maqsatynda 20 mobıldi ekologııalyq stantsııa satyp alý josparlanyp otyr. Bul qalanyń kez kelgen núktesine ornalastyrylyp, aýa sapasy týraly derekterdi naqty ýaqyt rejıminde alýǵa múmkindik beredi.
– Jańa stantsııalar aýa sapasynyń qaı jerde jáne qandaı sebeptermen nasharlaıtynyn anyqtaýǵa kómektesedi. Atap aıtqanda, kólik júktemesiniń áseri, óndiristik nysandardyń qyzmeti nemese jeke sektorda qatty otyndy paıdalaný saldarynan týyndaıtyn lastaný deńgeıi baǵalanady, - delingen Almaty máslıhatynyń baspasóz qyzmeti taratqan habarlamada.
Jınalǵan derekter naqty sheshim qabyldaýǵa negiz bolady. Atap aıtqanda, lastaný kózderine baqylaýdy kúsheıtý, jol qozǵalysyn uıymdastyrýdy jetildirý, qoǵamdyq kólikti damytý, tómen emıssııa aımaqtaryn (LEZ) engizý jáne jekelegen aýmaqtardy gazdandyrý sharalaryn iske asyrý máseleleri qarastyrylady.
Sonymen qatar mobıldi stantsııalar 2-JEO-yn gazǵa kóshirý, qoǵamdyq kólik parkin jańartý jáne jańa ekologııalyq standarttardy engizý sııaqty iri ekologııalyq jobalardyń tıimdiligin obektıvti baǵalaýǵa múmkindik beredi.
Eske salaıyq, buǵan deıin Almatyda tómen emıssııa aımaǵynyń (LEZ) pılottyq jobasy aıasynda jol belgileri men aqparattyq taqtalaryn ornatý jumystary bastalǵanyn habarlaǵanbyz.
