Almatyda aýany lastaǵan júrgizýshilerge júzdegen mıllıon teńge aıyppul salyndy

ALMATY. KAZINFORM – Almatyda aýany lastaǵan júrgizýshilerge salynǵan aıyppul kólemi 350 mıllıon teńgeden asty.

Qaladaǵy aýanyń lastanýyna áser etetin negizgi sebeptiń biri — avtokólikter. Bul týraly qalalyq ekologııa departamentiniń basshysy Dinmuhamed Lesbekov Óńirlik kommýnıkatsııalar qyzmetinde ótken brıfıngte aıtty.

Onyń málimetinshe, Almatyda 706 myńnan astam kólik tirkelgen, oǵan qosa kún saıyn qalaǵa shamamen 400 myń kólik shetten kirip-shyǵady. Almatyda aýaǵa taraıtyn zııandy zattardyń mólsherin qadaǵalaý úshin 19 ekologııalyq beket qoıylǵan.

– Bıyl toǵyz aıdyń ishinde aýaǵa zııandy zattardy shekti mólsherden artyq bólgeni úshin 18 myńnan astam ákimshilik quqyqbuzýshylyq tirkeldi. Avtokólik ıelerine 355 mıllıon teńgeden astam aıyppul salyndy, - dedi Lesbekov.

Onyń aıtýynsha, qabyldanǵan sharalarǵa qaramastan, qala kóshelerinde áli de qoıý qara tútin shyǵaratyn kólikter bar.

– Kóligińizdiń tehnıkalyq aqaýy bolsa, ony jóndeýdi keıinge qaldyrmańyz. Sebebi osy aýamen ózińiz de, bala-shaǵańyz ben jaqyndaryńyz da tynys alady. Qalanyń aýasyn taza ustaý – árqaısymyzdyń jeke jaýapkershiligimiz, - dedi ol.

Lesbekovtyń sózinshe, Almatyda aýa sapasyn jaqsartýdyń jańa erejeleri ázirlengen. Qujatta aýaǵa taraıtyn zııandy zattardy baqylaýǵa qoıylatyn naqty talaptar, olardyń mólsherin azaıtý sharalary, lastaný deńgeıi tómen aımaqtardy damytý jáne aýa sapasyn úzdiksiz monıtorıngteý júıesin jasaý qarastyrylǵan.

Buǵan deıin Almatyda ekologııalyq ahýaldy jaqsartý maqsatynda otshashýǵa tyıym salý jáne kólikterge arnalǵan aqyly aımaqtar engizý máseleleri qarastyrylyp jatqanyn habarlanǵanbyz.