Almatyda aýany lastaǵan avtoparkter 13 mln teńge aıyppul tóledi
ASTANA. KAZINFORM – Almatyda avtobýs parkterine atmosferaǵa zııandy zattardy shamadan tys shyǵarǵany úshin aıyppul salyndy, dep habarlaıdy Almaty qalasy ákimdiginiń baspasóz qyzmeti.
«Eco Almaty» JShS ókilderi megapolıstegi avtokólik shyǵaryndylaryna júrgizilgen monıtorıng aıasynda №3 kommýnaldyq avtobýs parkin teksergen.
– Kásiporyn mamandarynyń málimetinshe, avtoparkte 289 avtobýs tirkelgen, onyń 40-y jóndeýde tur. Tekserý barysynda mamandar 249 kólikti tekserdi. Qorytyndysynda 50 avtobýsta paıdalanylǵan gazdardy tazartýǵa arnalǵan negizgi qurylǵy – katalızatordyń joq ekeni belgili boldy, – delingen qala ákimdiginiń aqparatynda.
Monıtorıng atmosferalyq aýany qorǵaý talaptaryn júzege asyrý maqsatynda ótkizilip otyr. Onyń basty mindeti – qaladaǵy negizgi lastaýshy kózderdiń biri sanalatyn avtokólik shyǵaryndylaryn azaıtý.
– Ekologııalyq talaptardyń saqtalýyn baqylaý turaqty negizde júrgiziletinin atap ótken jón. Máselen, Ekologııa departamenti birqatar avtokólik kásipornyna qatysty jospardan tys tekserý ótkizdi. «NEO City TRANS» JShS men «TALAP T» JShS avtobýs parkterinde júrgizilgen ólsheý nátıjeleri keıbir kólikterde zııandy shyǵaryndylardyń belgilengen normadan asyp ketkenin kórsetti, – dep habarlady ákimdiktiń baspasóz qyzmeti.
Anyqtalǵan zańbuzýshylyqtarǵa baılanysty QR ÁQBtK-niń 333 jáne 334-baptary boıynsha ákimshilik hattamalar rásimdelip, jalpy somasy 13,3 mln teńge aıyppul salyndy. Sonymen qatar kásiporyndarǵa kemshilikterdi joıý jóninde tıisti nusqamalar berildi.
Aıta keteıik, buǵan deıin 2027 jyly Almatyda kólik pen ónerkásip nysandaryna ekologııalyq talap kúsheıetinin jazdyq.
