Almatyda aýa raıyna baılanysty keptelis 10 balǵa jetti
ALMATY. KAZINFORM — Almaty kóshelerinde keptelis kúsheıdi.
2GIS málimetine sáıkes, qalanyń barlyq negizgi kósheleri «qyzyl» jáne tipti «qoıý qyzyl» túspen boıalǵan. Jalpy qala boıynsha keptelis deńgeıi — 10 ball.
Ádette adamdar jumystan qaıtar kezde bastalatyn keptelistiń kúni boıy azamaı turýynyń basty sebebi — qalada toqtamaı jaýyp turǵan qalyń qar.
Eske salaıyq, Almatynyń kommýnaldyq qyzmeti aýa raıyna baılanysty kúsheıtilgen rejımge kóshti. «Qazgıdromet» RMK málimetinshe, 15 qańtardan 16 qańtarǵa qaraǵan túni bastalǵan qar 17 qańtar keshke deıin jalǵasady.
Almaty ákimdigi táýlik boıyndaǵy jumysqa 1 030 arnaıy tehnıka, sondaı-aq jeke uıymdardan 200 tehnıka men 2 710 jumysshy jumyldyrylǵanyn habarlady. Aýla aýmaqtaryn tazalaý jumystaryna 1 790 jumysshy men 256 arnaıy tehnıka tartylǵan. Al aýdan ákimdikterinde atqarylyp jatqan jumystardyń oryndalýyn baqylaý maqsatynda táýlik boıǵy kezekshilik engizildi.