Almatyda «Atakent» aýmaǵy jańartylady

ALMATY. KAZINFORM — Almatyda «Atakent» aýmaǵyn jańǵyrtý jumystary bıyl bastalady. Bul týraly megapolıs basshysy Erbolat Dosaev Bostandyq aýdanynyń turǵyndarymen kezdesýde málim etti.

— Bıyl Atakent iskerlik yntymaqtastyq ortalyǵynyń aýmaǵynda jańǵyrtý jumystary bastalady. Onyń aıasynda asfalt jabyndysy men tas tósenishterdi aýystyrý, avtomatty sýarý júıesin ornatý, jaryqtandyrý men kóshe jıhazdaryn jańartý bar, — dedi ol.

Aıtýynsha, «Ońtústik» saıabaǵyna jaıaý júrginshiler joly tóselip, Nur-Alataý shaǵyn aýdanyndaǵy skverde kórkeıtý jumystary júrgiziledi.

— 2024 jyly úsh serýen aımaǵyn kórkeıtý jumystary aıaqtaldy. Atap aıtar bolsaq, Abaı dańǵylynyń Turǵyt Ozal kóshesinen Baızaqov kóshesine deıingi bóligi, Jeltoqsan kóshesiniń Abaı dańǵyly men Sátbaev kóshesi arasyndaǵy ýchaskesi jáne Abaı men Gagarın dańǵyldarynyń qıylysyndaǵy skver. Bul jobalar aıasynda jańa balalar jáne sport alańdary, kóshe jıhazdary, demalys oryndary ornatylyp, jaryqtandyrý júıesi jańǵyrtyldy, sondaı-aq jasyl jelek otyrǵyzyldy. Sonymen qatar, byltyr Gagarın dańǵyly boıyndaǵy býlvardaǵy qurylys aıaqtaldy, al bıyl sáýir aıynda onyń kógaldandyrý jumystary bitedi, — dedi qala basshysy.

Osyǵan deıin Erbolat Dosaev «Atakent» aýmaǵyn jańǵyrtý jobasy ázirlenip jatqanyn aıtqan edi. 

Eske salaıyq, buǵan deıin «Atakent» ortalyǵynyń terrıtorııasy qala menshigine qaıtarylǵany týraly jazǵan bolatynbyz.