Almatyda áskerı qyzmetshiler maıdanger baılanysshyny ǵasyrlyq mereıtoıymen quttyqtady
ASTANA. KAZINFORM — 20 sáýir kúni Uly Otan soǵysynyń ardageri Lıýbov Nıkolaevna Gorkovskaıa 100 jasqa toldy. Bul týraly Qorǵanys mınıstrliginiń baspasóz qyzmeti habarlady.
Osy kúni ony jergilikti áskerı basqarý organdarynyń áskerı qyzmetshileri, Bostandyq aýdany ákimdiginiń ókilderi jáne Qarýly kúshterdiń ardagerleri arnaıy kelip quttyqtady.
Almaty qalalyq «Qarýly kúshterdiń ardagerleri» qoǵamdyq birlestiginiń ókili, otstavkadaǵy polkovnık Tólegen Mustafın oǵan syılyqtar tabystap, Qorǵanys mınıstriniń atynan quttyqtaý hatyn oqyp berdi. Áskerı qyzmetshiler Lıýbov Nıkolaevnanyń Jeńiske qosqan zor úlesi úshin alǵys aıtyp, oǵan zor densaýlyq pen otbasyna amandyq tiledi.
Lıýbov Nıkolaevna 1925 jyldyń 20 sáýirinde Ýkraınanyń Lýgansk oblysynda dúnıege kelgen. 1943 jyly ol maıdanǵa óz erkimen attanyp, áskerı baılanysshylar kýrsyn támamdaǵannan keıin, Birinshi Ýkraına maıdanynyń jaıaý ásker atqyshtar dıvızııasy altynshy polkiniń quramyna qosyldy.
Harkov túbindegi urystar kezinde onyń dıvızııasy qorshaýǵa túsedi. Alaıda 1944 jyldyń sáýirinde áskerı bólim jaý sheńberinen shyǵyp, keıinnen azat etilgen Sevastopolge jetedi. Keıin Lıýbov Gorkovskaıa Belorýssııa men Baltyq elderi úshin bolǵan shaıqastarǵa qatysady, jeńis týraly habardy da sol jaqta estıdi.
Soǵysta kórsetken erlikteri úshin Lıýbov Nıkolaevna I jáne II dárejeli Otan soǵysy ordenderimen, medaldarmen marapattalǵan.
Soǵystan keıin ol týǵan aýylyna oralyp, halyq aǵartý bóliminde jumys istedi. 1946 jyly joldasymen birge Qazaqstanǵa kóship kelip, eńbek jolyn jalǵastyrdy.
Lıýbov Nıkolaevnanyń eki balasy bar. Qazir densaýlyǵy syr berip júr. Bostandyq aýdanynyń qorǵanys isteri jónindegi basqarmasynyń áskerı qyzmetshileri ardagerge jıi baryp, qoldan kelgenshe qoldaý kórsetip keledi.
Aıta ketelik ardagerlerge arnaýly memlekettik járdemaqy túrinde 4,3 mlrd teńge tólendi.