Almatyda áskerı qyzmetshiler 103 jasqa tolǵan maıdangerdi týǵan kúnimen quttyqtady

ALMATY. KAZINFORM – Almaty qalasynda soǵys ardageri Zulharnaı Seıitov 103 jasqa toldy. Ony quttyqtaýǵa Almaly aýdany qorǵanys isteri jónindegi basqarmasynyń áskerı qyzmetshileri keldi. Bul týraly Qorǵanys mınıstrliginiń baspasóz qyzmeti habarlady. 

Olar Zulharnaı Seıitovke Qorǵanys mınıstriniń atynan quttyqtaý hatyn tabystap, zor densaýlyq pen amandyq tiledi.

– Ardagerler – tarıhtyń tiri kýágerleri, eldiń abyroıy men dańqy. Maıdangerdiń erligin umytpaý, qamqorlyq kórsetý jáne batyrlyǵy men tózimdiligi týraly estelikti jas urpaqqa jetkizý – bizdiń mindetimiz, - dedi Almaty qalasy Almaly aýdany QІB tárbıe jáne ıdeologııalyq jumys bóliminiń bastyǵy kapıtan Gúlsim Bákirova.

Óz kezeginde ardager Zulharnaı Seıitov te áskerı qyzmetshilerge beıbit ómir, qyzmette tabys jáne otbasylaryna baq-bereke tiledi.

Zulharnaı Seıitov 1922 jylǵy 27 jeltoqsanda Jańa Qypshaq (Reseı, Omby oblysy) aýylynda dúnıege kelgen. 1942 jyly qyzyl ásker qataryna shaqyryldy. Uly Otan soǵysy jyldarynda Stalıngradtan Berlınge deıingi maıdan jolynan ótti. Belarýs pen Polshany azat etýge qatysyp, Potsdam saraıyn mınadan tazartý jumystaryna atsalysty. Maıdandastarymen birge fashıstik Germanııanyń astanasyna shabýyl jasady.

Maıdanger Qyzyl Juldyz ordenimen, «Erligi úshin» medalimen jáne basqa da nagradalarmen marapattalǵan.

Soǵystan keıin Zulharnaı Seıitov Omby aýyl sharýashylyǵy ınstıtýtyn támamdady. Qazaqstanǵa qonys aýdaryp, ǵylym jolyna bet burdy. Ol – bıologııa ǵylymdarynyń doktory, respýblıkalyq Ǵylym akademııasynyń akademıgi, Qazaqstan-Reseı medıtsınalyq ýnıversıtetiniń molekýlalyq bıologııa kafedrasynyń professory.

Zulharnaı Seıitov 150-den astam ǵylymı eńbek pen monografııanyń, 10 oqý quralynyń avtory. Onyń 14 patenti jáne segiz avtorlyq kýáligi bar. Ǵalymnyń zertteýleri Qazaqstannyń medıtsınasy men tamaq ónerkásibiniń damýyna eleýli úles qosty.

Eske sala keteıik, buǵan deıin Rıdderde qalǵan jalǵyz ardager qaıtys bolǵanyn jazǵan edik.