Almatyda áskerge shaqyrylýshylarǵa arnalǵan jańa jınaq pýnkti ashyldy
ALMATY. KAZINFORM – Almatyda áskerge shaqyrý naýqanynyń tıimdiligin arttyrýǵa baǵyttalǵan jumys júrgizildi.
Almaty ákimdiginiń málimetinshe, qalalyq jınaq pýnkti Túrksib aýdanynda, V.Berınga kóshesi, 31 mekenjaıyndaǵy buryn Almaty qalasynyń ІІM akademııasy ornalasqan ǵımaratqa aýysty.
– Jalpy aýdany 2800 sharshy metr, irgeles aýmaǵy 0,63 gektar nysan tolyq paıdalanýǵa daıyn jáne qazirgi zamanǵy qaýipsizdik pen ınfraqurylym talaptaryna tolyq sáıkes keledi. Ǵımaratta akt zaly, sport zaly jáne ashana bar, bul áskerge shaqyrylýshylar men qyzmetkerler úshin barynsha qolaıly jaǵdaı jasaýǵa múmkindik beredi, - dep habarlady ákimdikten.
Qazir ǵımarat qalanyń kommýnaldyq menshigine berilip, Almaty qalasynyń mobılızatsııalyq daıyndyq jáne aýmaqtyq qorǵanys qyzmetiniń qaramaǵyna bekitilgen.
Onda Almaty qalasy Jumyldyrý daıyndyǵy, aýmaqtyq jáne azamattyq qorǵanys basqarmasy ǵımaratta aǵymdaǵy jóndeý jumystaryn júrgizgen.
– 2019 jyldan bastap, qalalyq jınaq pýnkti ýaqytsha Qorǵanys mınıstrliginiń «Áskerı-tehnıkalyq mektebi» RMK bazasynda (Bostandyq aýdany) ornalasqan bolatyn. 2025 jyldyń kókteminde 1 686 adam, al kúzgi áskerge shaqyrý kezinde 1 930 adam shaqyrylǵanyn eskere otyryp, pýnktti jańa, arnaıy beıimdelgen ǵımaratqa kóshirý týraly sheshim qabyldandy, - dep habarlady ákimdikten.
Eske salaıyq, Qazaqstanda áskerge shaqyrylýshylardy esepke alý qaǵıdasy ózgerdi.