Almatyda ashyq aspan astyndaǵy tegin ıoga men stretchıng jattyǵýlary jalǵasyp jatyr
ASTANA. KAZINFORM – Almatyda buqaralyq sportty damytýǵa jáne salaýatty ómir saltyn nasıhattaýǵa baǵyttalǵan ALMATY MOVE qalalyq jobasy jalǵasyp jatyr.
Joba Almaty qalasy Sport basqarmasynyń bastamasymen júzege asyrylýda.
Ótken jeksenbide qalanyń eki alańynda uıymdastyrylǵan tegin jattyǵýlarǵa 100-ge jýyq turǵyn qatysty.
– Tańǵy saǵat 09:00-de 28 gvardııashy-panfılovshylar atyndaǵy saıabaqta ıoga sabaǵy ótti. Dál osy ýaqytta Tuńǵysh Prezıdent qory saıabaǵynda stretchıng boıynsha jattyǵý uıymdastyryldy, – delingen habarlamada.
Qala turǵyndary demalys kúnin taza aýadaǵy belsendilikpen bastap, densaýlyǵyn nyǵaıtýǵa múmkindik aldy.
Almaty qalasy Sport basqarmasynyń málimetinshe, mundaı jattyǵýlar sportty barshaǵa qoljetimdi etýge, sondaı-aq turǵyndar arasynda bos ýaqytty belsendi ári paıdaly ótkizý mádenıetin qalyptastyrýǵa baǵyttalǵan.
ALMATY MOVE jobasy aldaǵy ýaqytta da qalanyń túrli aýdanynda jalǵasady. Tegin jattyǵýlardyń ótetin orny men ýaqyty týraly aqparat jobanyń jáne Almaty qalasy Sport basqarmasynyń Instagram jelisindegi resmı paraqshalarynda jarııalanyp otyrady.
Aıta keteıik, astanalyqtar da jaz boıy tegin ıogamen aınalysa alady.
